Fracasu de la OPA de Telefónica sobre Terra

Anque Telefónica nun foi a conseguir el 75% del capital de Terra Lycos na OPA, la compañía de telecomunicaciones dio anuncia de que va siguir de toles formes cola operación. Esta OPA va suponer que Telefónica va tener que poner más de 1.000 millones d´euros pa recuperar les acciones. Al pieslle de la OPA sobre Terra solo acudiere a la operación el 34% del accionariáu, y anque Telefónica ya tenía'l 38% de Terra, ello foi que la primer empresa del Estáu nun algamó'l so oxetivu de tomar el 75% de la filial d´Internet. Al entamu de la OPA ente los planes de Telefónica destacaben el sacar a Terra de la Bolsa de Madrid asina como facer de la empresa d´Internet casi un departamentu de la matriz. Agora la empresa de telecomunicaciones tien que replantease la estratexa ante´l fracasu de la OPA ya que dientru de la compañía creien que diben a facese col 90% del capital Terra. Los analistes nun creen que a curtiu plazu Terra salga del parqué madrilanu ya que con un free-float del 20% nun tien sentíu facer una OPA d´esclusión.



Otramiente, l´asociación de usuarios de banca (ADICAE) va pidir a Telefónica 7.000 millones d´euros polos daños fechos a los pequeños inversores. Consideren que la intromisión de Telefónica nel negociu d´ADSL de Terra ye delictiva. Asinamesmo acusen a la matriz del grupu d´engañar a los inversores inflando el valor bursátil de Terra y de xenerar falses espectatives alrodiu la viabilidá de la empresa d´Internet.