Fonte Fuécara y Prau Llerón van representar a Asturies nel Interceltique de Lorient xunto con Rubén Alba y L-R

|
Rubén Alba n'Ortigueira

La programación del XLIX Festival Interceltique de Lorient, que va tener llugar nesta población bretona del 2 al 11 d’agostu, va presentase na tarde d’esti xueves. Asturies va llevar un añu más una bona representación, con Fonte Fuécara, Prau Llerón, el gaiteru Rubén Alba y el dúu L-R nuna edición dedicada a Galicia.

L’anuncia completa de los horarios y formaciones participantes de toles naciones celtes que se xunten n’An Oriant tolos meses d’agostu mientres 10 díes va facese a les 20 hores y va poder conocese pela web del festival y nes sos redes sociales. Na cita nun va faltar Asturies, que nesta ocasión va desplazar a la Banda Gaites Fonte Fuécara, de Llanera, y el Grupu Folclóricu Prau Llerón, de Mieres, pa participar na Gran Parade des Nations Celtes, el gran desfiles del Interceltique con miles d’espectadores tanto en direuto como en televisiones internacionales; nes Nuit Interceltique Bretagne, l’espectáculu máxicu que s’entama nel stade de Moustoir, llar del Lorient FC, mientres dellos díes; y en delles actividaes a lo llargo del certame.

La delegación asturiana van completala los cuatro gaiteros que se clasifiquen pal Trophée Mac Crimmon, qu’enfrenta a músicos asturiano y gallegos y que domina Asturies dende’l 2013, al traviés del Memorial Remis Ovalle. Amás, van viaxar a An Oriant a presentar la so propuesta musical el gaiteru Rubén Alba, ganador precisamente del Mac Crimmon nel 2002 y 2006, que tien asoleyáu’l trabayu discográficu ‘Despertar’, y el dúu L-R, que baxo la etiqueta post-folk ye una de les sensaciones de la música asturiana nos tiempos últimos y ta acabante de sacar del fornu’l so primer discu.

Na semeya, Alba mientres la collaboración de dos gaiteros gallegos cola so banda nel Festival Internacional do Mundo Celta de Ortigueira'l branu pasáu.

Contador Estadistiques