Fomentu anuncia inversiones nel prerrománicu astur

El Ministeriu de Fomentu echó ayeri a andar el concursu del plan director sobre los monumentos del Prerrománicu asturianu qu'afecta a seyes edificios: Santa María del Naranco, San Miguel de Lliño, San Xulián de Santuyano, la Foncalada, Santa Cristina de L.lena y San Salvador de Valdediós. Sicasí, el plan ye parcial, afectando namás a los edificios declaraos "patrimoniu de la humanidá" y nun va beneficiar a bien de monumentos prerrománicos precisos d'estudiu y remocique, casos de la ilesia de Tuñón, Fuentes o Santianes, por poner dellos. La Cámara Santa tamién queda fuera d'esti plan pero porque yá ta enxerta nel específicu pa la catedral

Con un presupuestu de 186.000 euros que se carguen al 1% cultural, el plan va servir pa estudiar l'estáu en que tan los monumentos, y ñaz col oxetivu de facer un espediente completu, históricu y gráficu qu'espeye la historia y evolución de cada monumentu como material d'archivu pa la investigación, enseñanza y divulgación dende los puntos de vista urbanísticu, arquitectónicu, arqueolóxicu, históricu y mediuambiental. D'otra banda, el trabayu va recoyer tamién los males y patoloxíes que presenten los edificios, plantegando les actuaciones y estudios que más precisen xunta l'estudiu de restauraciones.