Finó la campaña de trampéu de l’aviespa asiática y preparáse la de control del plumeru de La Pampa

La llucha contra les especies invasores sigue tando na axenda de la conseyería nueva de Mediu Rural y Cohesión Territorial. Tres finar cola campaña de trampéu primaveral del tártagu asiáticu, que va siguir cola de retirada niales nos meses próximos, yá se trabaya na planificación de la de control del plumeru de La Pampa.

La campaña de trampéu primaveral de l’aviespa asiática zarróse con un aumentu de les captures de reines d’un 600 por cientu al respeutive de tol añu pasáu. En concreto, prindáronse 110.694 exemplares frente a los 15.717 del 2019.

Alredor de 4.000 voluntarios, axuntaos na plataforma www.avisap.es y coordinaos polos conceyos, foron quién a asitiar 7.749 trampes per toa Asturies, lo que supón un 115 por cientu más que l’añu anterior, cuando s’instalaron 3.609. D’equí p’alantre va dase continuidá a los trabayos cola retirada de niales nuna collaboración estrecha col Serviciu d’Emerxencies del Principáu, al traviés de Bomberos d’Asturies, el 112 y Proteición Civil.

Nesi sen, la selmana qu’entra va celebrase una xunta del comité asesor contra’l tártagu asiáticu que va analizar y va consensuar les midíes a adoptar.

Otres especies

El direutor xeneral del Mediu Natural y Planificación Rural, David Villar, que dio los datos de la campaña nel Centru d’Alarma y Control de La Mata en compañía de Fernando Prendes, responsable d’Infraestructures Rurales y Montes, anunció una nueva de control sobre’l plumeru de la pampa dientro del plan nacional pa un posible desaniciau d’esta especie, que florez n’agostu. Los trabayos d’eliminación de plántules y destoconáu van priorizar les zones de más interés natural, mentes que tamién van desenvolvese actuaciones pilotu en collaboración cola Direición Xeneral d’Infraestructures Viarias y Portuaries.

Esti centru asitiáu nel conceyu de Grau ye tamién una pieza clave na llucha biolóxica contra especies como l’aviespa de la castañal o’l gonipterus. Prendes resaltó que la primera afeuta de forma negativa a la producción de castaña de frutu nel país, polo que’l Gobiernu lleva tiempu investigando y actuando, tanto en montes públicos como privaos, cola suelta selectiva del torymus, insectu alóctonu que s’alimenta de la viéspora.

Nesta mesma llinia d’actividá rescampla tamién la que se fai contra’l gonipterus, un coleópteru qu’afecta al ocalitu y que se combate cola suelta del himenópteru Anaphes nitens, dalgo que se vien trabayando nes instalaciones de La Mata dende’l 2016. Dende la conseyería rescamplóse la collaboración de la Caja Rural de Asturias nesta llucha contra estes especies invasores, que se va ampliar pa la siguiente campaña de trampéu contra’l tártagu asiáticu.