Finalistes asturianos nos Premios de la Música

Ayeri diose anuncia de cualos van ser los trés finalistes pa la edición 2.004 de los Premios qu'entrega l'Academia de la Música, y que tien como novedá esti añu l'apaición de la categoría de meyor cantar n'asturianu.

La Sociedá Xeneral d'Autores y Editores (SXAE) asoleyó ayeri les llistes definitives de finalistes, que son trés por categoría. Aparte de los premios de más rellume, que van repartise ente Alejandro Sanz, Las Niñas y Alex Ubago, polo que nos toca a los asturianos, na categoría al meyor cantar n'asturianu los trés escoyíos son "Tejedor" con "Andolina", Nacho Vegas por "La canción de Duermevela" y Manolo Morán por "Nunca Mais". Aparte d'estos trés nominaos, otru músicu asturianu, el gaiteru José Ángel Hevia, ye tamién finalista na categoría de "Meyor Álbum de Música Tradicional" col so "Étnico Ma non Troppo", compitiendo con María Dolores Pradera y Carlos Nuñez. Pa ver los finalistes d'otres categoríes namás hai que visitar la web de los Premios de la Música. La ceremonia d'entrega de los Premios va ser el próximu 15 d'abril nel "Palacio Municipal de Congresos del Campo de las Naciones de Madrid", esi día va sabese si Hevia lleva'l premiu na so categoría y cuál ye a xuiciu de l'Academia de la Música'l meyor cantar n'asturianu de 2003.