Fernando Alonso val-lo

El pilotu asturianu de Fórmula 1 Fernando Alonso confirmó na segunda carrera del añu en circuitu de Sepang (Malasia) tolo bueno que venía diciéndose d'elli al conseguir la Pole position nos entrenos y la tercer plaza final nuna carrera que demostró la igualdá qu'hai ente los coches de cabeza y que la quinta nueva de corredores, con Alonso y Raikkonen, ta en condiciones de quita-yos el puestu a les vaques sagraes de la categoría.

El sábadu Fernando Alonso firmó una vuelta de calificación redonda. Cerca del 1,36, veíase que'l tiempu d'Alonso diba dexalu arriba, pero la sospresa yera ver como según diben saliendo los demás pilotos naide nun yera quien a baxar el tiempu del asturianu. Nin siquiera'l campeón Schumacher pudo ayeri colos Renault, quedando terceru a una décima del compañeru d'Alonso, Jarno Trulli y a tres décimes del asturianu, que se convertía nel pilotu más mozu en marcar un primer tiempu n'entrenos.

Dicíase que los Renault salieren con poca gasolina pa pesar menos, pero en realidá l'apueste de los franceses pa marcar la pole foi el montar ruedes blandes, que tendríen de caltener en carrera por obligación del reglamentu. Ello diba obligalos a salir escopetaos n'abriendo'l semáforu p'abrir furacu y cambiar les cubiertes primero que la competencia, y asina foi. Alonso aguantó la cabeza les primeres trece vueltes mientres Schumacher llevaba per delantre al compañeru del asturianu y el tamién veteranu Coulthard (McLaren) metía'l coche pela pación pa retirase. Na vuelta catorce Alonso salió con cubiertes nueves yá tres de Raikonen, que volaba col McLaren Mercedes y tres d'otros pilotos llegando a garrar la segunda plaza coles entraes a boxes, pero'l brasileñu Barrichelo (Ferrari) yá diba pisándo-y la culera al Renault del asturianu, que tenía tocada la caxa de cambios. Esti problema obligó a Alonso a ceder énte'l coche encarnáu, pero la ventaya que llevaba sobre'l cuartu foi abondo pa llegar a meta en tercer posición, rematando una carrera perfecta, y eso con 38,5 de fiebre y tomando antibióticos. Alonso llegó a la meta "como un zombi" y con calambres nos deos de tener que cambiar ensin l'automáticu, anque dixo qu'así va faciéndose a la retirada obligatoria por reglamentu del cambiu automáticu del Gran Premiu d'Inglaterra p'alantre.