Fernando Alonso podría cambiar d'equipu

La Fórmula 1 sigue revolucionada colos resultaos del pilotu asturianu Fernando Alonso, que ye la estrella del deporte del motor del momentu. D'una parte, la casa Renault, que nun contaba con disputar trunfos hasta l'añu qu'entra, ta acelerando los planes pa meyorar la potencia del motor que lleva'l coche del asturianu, y yá pa la carrera d'Austria (18 de mayu) podría ser fácil qu'Alonso estrenare una versión nueva del propulsor francés con más tiru. Xunta esto, la confirmación d'Alonso na élite del automovilismu mundial col segundu puestu na carrera de Cataluña punxo al pilotu carbayón en medio de tola ruxidera de fichaxes y cambeos d'asientu, que normalmente nun suel echar a andar hasta depués d'amediada la temporada. L'anuncia soltola'l manager de Fernando Alonso, l'ex-pilotu Adrián Campos, quien dixo qu'otros equipos teníen interés en fichar al asturianu, apurriendo los nomes de McLaren Mercedes y Williams BMW. Campos nun quixo dicir más, pero sí qu'esclarió que'l futuru d'Alonso nun pasa de momentu pela Ferrari