Fernández desmiente “de manera categórica” que’l Gobiernu plantegue desarrollu eólicu en zones protexíes

El conseyeru d’Industria, Emplegu y Promoción Económica negó “de manera categórica y rotunda” que’l Gobiernu plantegue parques eólicos en zones protexíes. Enrique Fernández Rodríguez apuntó que lo que se pretende cola ordenación territorial nueva “ye aprovechar la fola de desarrollos eólicos” nel Estáu pa buscar inversión n’Asturies.

“Na zona occidental, onde esiste amás el mayor recursu eólicu, plantegamos que se puedan instalar parques y amás repotenciar los esistentes. Na zona centru, venceyáu principalmente a iniciatives d’hidróxenu verde o industriales, plantegamos que se puedan instalar tamién parques. Y tamos valorando d’una forma más residual, porque’l recursu eólicu ye escasu y polo tanto nun hai interés por parte de los promotores, que pueda haber un desarrollu munchu menor na zona oriental”, esplicó’l conseyeru, que recalcó que “nunca, nunca, en zones protexíes”.

Sobre’l procesu de revisión de les Directrices Sectoriales d'Ordenación del Territoriu sobre Enerxía Eólica actuales apuntó que va ser “un procesu llargu que va consumir los meses próximos, y inclusive ye posible que dalgún añu”. Tamién quixo mandar un “mensaxe de tranquilidá a los vecinos de Somiedu” pol proyeutu pa la instalación de dos complexos eólicos en plenu Parque Natural, insistiendo que’l Gobiernu nun va promover “parques eólicos y torres eóliques en nenguna de les zones naturales protexíes n’Asturies”.

Na imaxe, Fernández Rodríguez el vienres tres el Conseyu de Gobiernu, cuando fixo estes declaraciones. Semeya obra d'Armando Álvarez.