El sindicalista Fernández Villa, investigáu por ocultar a Facienda 1,4 millones d'euros

|

La Fiscalía Anticorrupción investiga al ex secretariu xeneral del SOMA-FITAG-UXT, José Ángel Fernández Villa, por ocultar a Facienda 1,4 millones d’euros. Javier Fernández, presidente d’Asturies y secretariu xeneral de la FSA-PSOE, anunció la so espulsión “inmediata” del partíu.

El diariu ‘El País’ adelantaba anueche que les investigaciones sobre l’orixe d’esta importante cantidá de perres principiaron hai más d’un añu depués de que Fernández Villa s’acoyera a l’aministia fiscal entamada por Mariano Rajoy nel 2012. Los ingresos únicos reconocíos que tien son los correspondientes a la so actividá como sindicalista, como diputáu n’Asturies (1983-2007) y como senador (1999-2003), asina como nel conseyu d’alministración d’HUNOSA. Nel casu de qu’Anticorrupción comprobara qu’esos 1,4 millones d’euros tienen una procedencia ilícita, presentaría una acusación nel xulgáu que correspuenda.

Pese a nun querer dar declaraciones, el sindicalista mineru aseguró al periódicu madrilanu que nun defraudó a Facienda, pero les reaiciones n’Asturies nun tardaron en llegar. Esta mesma mañana, el líder de los socialistes asturianos y presidente del país anunció la so espulsión “inmediata” del partíu con caráuter cautelar. Fernández espresó la so “decepción” pola noticia y señaló qu’esti casu ye entá “más grave” que’l de Jordi Pujol o les tarxetes de Caja Madrid pola importancia de Fernández Villa nel movimientu sindical y socialista a nivel estatal.

Mentes, dende’l SOMA-FITAG-UXT, sindicato del que’l llangreanu foi sectretariu xeneral per 34 años (1979-2013) tamién amosaron la so “sorpresa” poles investigaciones d’Anticorrupción. Esti miércoles van tratar l’asuntu na executiva que teníen prevista pa güei.

Comentarios

Coimes, pues yá me parecen poques perres. Y ver al "Pelucu" (H.avier Fernández F$A-P$O€) renegando d'él, depués de tar ehí pol so mandéu....

Contador Estadistiques