Fernández Avello ufierta siete composiciones vocales n'asturianu en ‘Álbum de canciones’

El compositor Manuel Fernández Avello va presentar esti sábadu n’Uviéu la so obra ‘Álbum de canciones’. Esti trabayu inclúi siete cantares de creación basaes en testos, poemes o fragmentos d’autores en llingua asturiana.
 
L’Auditoriu del Conservatoriu Profesional de Música d’Uviéu, del que ye direutor, va acoyer l’actu de presentación a les 13 hores, eventu nel que tamién va tar presentes Consuelo Vega, direutora xeneral de Política Llingüística, y los críticos musicales Guillermo García Alcalde y Ramón Avello. Nél, Fernández Avello va falar del so trabayu de composición vocal que-y permitió ganar el Premiu de la Crítica RPA 2010 na categoría de ‘meyor composición’. L’actu va acabar con una actuación de la Camerata Revillagigedo.
 
‘Álbum de canciones’ inclúi siete temes temes de creación –nun estilu compositivu que define carauterístiques concretes de los cantares populares asturianes– basaes en testos del Padre Galo, Xuan María Acebal y Pin de Pría. Trátase d’un llibru de partitures acompañáu por un CD que supón una importante contribución a l'arriquecimientu del patrimoniu musical asturianu.