Felpeyu presentó "Yá" na SGAE

Los xixoneses "Felpeyu" ficieron ayeri pela mañana la presentación oficial pa la prensa del so discu "Yá!". El grupu gastó pal actu un prestosu montaxe, scalextric incluyío.

Ayeri pela mañana, nel local de la Sociedá Xeneral d'Autores d'Uviéu, "Felpeyu" aconceyó a la prensa pa una presentación abondo especial. Ello ye que los músicos recibieron a los periodistes enredando con una pista d'scalextric qu'ellos mesmos prepararon na sala de prensa. La cosa tien el so aquello, y ye qu'esti célebre xuguete ye ún de los elementos gráficos más importantes na prestosísima carpeta de "Yá", el nuevu discu del grupu xixonés, ellaborada por Rumaldo Barbero, qu'amás de músicu demuestra que s'arregla bien pa lo del diseñu.

Ente carrera y carrera colos cochucos en miniatura, la xente de Felpeyu comentaron los aspectos principales d'esti discu. Na rueda de prensa tuvieron presentes tolos miembros del grupu, Lisardo Prieto, Fernando Oyágüez, Ruma Barbero, Igor Medio, Carlos Redondo, Xuan Nel Expósito y Diego Pangua, amás d'un representante de "K Industria" empresa encargada de la distribución del discu. Igor Medio y Carlos Redondo tamién representaben al sellu qu'editó esti cd, "Tierra Discos", empresa creada polos miembros de la formación pa espublizar esti trabayu de "Felpeyu" y que d'agora en p'alantre quieren que-yos dea sofitu a otros grupos, pero siempre nel ámbitu del folk. Cabe la posibilidá de que d'equí a poco'l sellu espublize'l discu en directo de la banda, que namás ta disponible n'Australia.

Durante la rueda de prensa'l grupu faló de les razones que ficieron que se retrasare tanto la salida d'esti discu d'estudiu. Dellos proyectos, cambios na formación del grupu y tres xires per Australia fueron retrasando adulces la publicación de "Yá!". Esa ye principalmente la razón del nome del discu, ya qu' énte la entruga insistente a los miembros del discu de cuando salía'l discu, la rempuesta siempre yera la mesma, YÁ!. Nel aspectu musical los xixoneses comentaron que siguen cola mesma llinia qu'en discos anteriores con un cincuenta por cientu de composiciones y otru cincuenta d'igües sobre temes tradicionales, con munchos temes cantaos, pero buscando la simplicidá y la llimpieza, fuxendo del virtuosismu, p'algamar a la fín un soníu compactu, claru y definitoriu.

"YÁ!" ta nes tiendes dende esti llunes, y na nuestra tienda n'internet onde podéis mercalu calcando equí.