Felpeyu echa la despidida en Xixón

Felpeyu va despidise d'Asturies con un conciertu enantes de colar pa la so tercer xira per Australia. Felpeyu marcha esti próximu 3 de marzu pal hemisferiu austral nuna xira que va tenelos ocupaos tol mes marzu. Pero enantes de marchar, los "felpeyos" van regalanos un conciertu en Xixón. L'actuación va ser nel chigre "Ca Beleño" d'esta ciudá, a eso de les 22:30 hores el próximu miércoles 26. Nél vamos poder escuchar los temes más conocíos del grupu, "Chalaneru", "Tierra", "Chorín el llagareru"...etc. Pero tamién va haber unes cuantes pingarates en forma de canciones como adelantu de lo que va ser el so nuevu cd. Tamién nel "Ca Beleño", pero esta vez nel d'Uviéu, va haber conciertu. Los cántabros "Cambera'l Cierzu" toquen la nueche del xueves 27 a les 22:30. Nun ye la primer vez qu'esti grupu actua per Asturies, y amás tien bonos amigos ente los músicos asturianos, como se demuestra nes collaboraciones del so últimu discu, onde participó xente como Xuan Nel Expósito de "Felpeyu" o Elías García de "Llan de Cubel".