Fecha confirmada pal campeonatu de Bandes de gaites

La selmana qu'entra va celebráse el Campeonatu Nacional de
Bandes de Gaites.



Esta vegada el campeonatu cambia de llugar de celebración yendo
pal conceyu Llangréu. El parque Dolores F. Duro de la Felguera ye'l
sitíu escoyíu pa que les bandes compitan esti domingu día
7 a partir de les 12:30 hores. Nesta edición van ser 8 bandes de gaites
les que quieren conseguir el premiu a la meyor banda y a la meyor
sección de percusión. Nes ediciones anteriores la banda de gaites
"Llariegu" llevó casi
tolos premios, meyor banda de gaites na primer edición y meyor banda y
meyor sección de percusión el siguiente añu.
"Llariegu" tuvo cambios na dirección musical esti añu,
colo qu'esti campeonatu pue ser una forma de ver si la banda continua col bon
nivel que tenía hasta agora.



Esta tamién ye la oportunidá pa otres bandes de confirmar
los bonos resultaos d'otros años. Ye'l casu de "Villaviciosa-sidra
El Gaitero/Ribesella" y "La Tayuela
de Mecer" que van intentar esti añu acabar col casi
"monopoliu" de premios que tien "Llariegu".



Per otru llau les normes del campeonatu nun sufrieron cambios,
siguiendo'l apueste pol modelu de los campeonatos gallegos de bandes. El
concursu cuenta col patrociniu de Asociación Antiguos Alumnos de La
Salle, Cajastur, Guinness, Conceyu de
LLangréu.