Feble volume de negociu nes bolses

Los inversores marcharon de vacaciones nun ambiente bursátil con mui pocu volume de negociu. Los mercaos siguen cásique planos con dalguna baxada puntual polos malos resultaos empresariales. El petróleu ya tá en másimos énte l´ablucante xuba del consumu enerxéticu, mentantu una perimportante cayida histórica de los bonos norteamericanos nel mercáu de renta fixo vien a poner en dulda les polítiques de la Reserva Federal d´Estaos Xuníos. La selmana pasada la Bolsa de Madrid baxó cerca del 1%.

Ente les estadístiques de la selmana pasada destaca la recesión de la economía d'Italia, el país européu más que más problemes económicos presenta. Ye la primer vez qu´esti país entra en recesión de va diez años p'acá, pero los índices nun dexen llugar pa la dulda: La producción industrial baxó un 2,1%, muncho más de lo previsto, mientres el PIB italianu namás medró un probetayu 0,3%. Sicasí, la noticia nes bolses del Vieyu Continente la selmana pasada foi ensin dulda, la entrada del Gobiernu francés nel capital del xigante de los bienes d'equipu Alstom. Muncha polémica pola intervención público y mala noticia pa la Xunión Europea.

Nes cotizaciones, la selmana pasada'l sector financieru foi'l que más castigu llevó nes principales bolses europees. El vienres pasáu Wall Street pieslló en positivo nel índiz Dow Jones, mentantu l´índiz tecnolóxicu Nasdaq baxó mediu puntu porcentual.

La Bolsa de Madrid tuvo'l volume de negociu más baxu dende Febreru d´esti añu al algamar poco más de 800 millones d´euros negociaos. L´Ibex-35 asitiose al pieslle nos 6.930,80 euros con una perda selmanal del 0,94%. Repsol foi la estrella selmanal pola bona traza que presenta'l sector petroleru. Anque la situación de la petrolera n´Arxentina ye mala, los prósimos contratos de petróleu iraquino xunta la xuba del preciu del crudu emburriaron enforma'l valor, pesllando la selmana en 14,40 euros acción con una xuba el vienres penriba´l 1,4%. Zeltia foi otru valor que pieslló en postivo, medrando un 1,30% hasta los 6,22 euros acción. La noticia de la selmana n'España foi'l fracasu de la OPA de Hesperia sobre NH Hoteles. De toles maneres Hesperia dio anuncia de que diba mercar toles acciones que s'acoyeron a la OPA anque nun ye a algamar nin el 5% de la compañía, colo que queda fuera del Conseyu d´Alministración de la hotelera. Nel lláu de les perdes destaquen Sogecable, con una baxada penriba´l 2,3% y Indra y Mapfre, qu'anduvieron alrodiu del 1% caún. Permala selmana pal Grupu Telefónica onde tolos sos valores tuvieron cayíes importantes. L´índiz xeneral de la bolsa madrilana asisitase nos 1.815,70 puntos.

Los valores de les petroleres tovieron perimportantes avances gracies a la xuba llibre del preciu del petróleu. Mientres lo d'Iraq nun seya a salir al mercáu y la OPEP pase de modificar el volume de producción énte´l gran consumu enerxéticu d´esti branu, el preciu del oru prieto va xubir, y agora ta yá nos 30,3 dólares. Tamién hai munches preocupaciones sobre los posibles problemes en Estaos Xuníos al dase a conocer les baxes reserves de gasolina que tienen. Toes estes cuestiones asistien al preciu del barril Brent en másimos nos últimos cinco meses.

A la contra l´euru sigue cayendo, y ya val 1,133 dólares. Otramiente, nel mercáu de renta fixo los bonos norteamericanos tuvieron cayies fuertes, mentantu los bonos europeos tuvieron dalguna xuba d´interés. El bonu alemán tien una rentabilidá anguaño perbaxo'l 4%. Nel meyor de los casos les bolses van siguir estables esti branu, anque en pasando esti setiembre va ser clave pa conocer la tendencia que va marcar el mercáu hasta fin d´añu. De toles maneres, ensin una nidia recuperanza económica y una meyora de les perspectives empresariales, l´Ibex y el restu d´índices de referencia nun van medrar más de lo que ya ficieren esti añu.