Familia y amigos de Fernando G.R. denuncien la incomunicación que sufre’l deteníu

Familiares y amigos de Fernando G.R. al que Delegación del Gobiernu acusa de 18 ataques a sedes de partíos políticos y instituciones n'Asturies con aparatos esplosivos, celebraron ayeri una concentración de protesta polo que consideren una situación "inhumana" al llevar el presu más de 72 hores incomunicáu ensin poder recibir asistencia llegal n'aplicación de la Llei Antiterrorista.

Más de 200 persones asistieron a la convocatoria de familiares y amigos de Fernando G.R. na Plaza'l Parchís de Xixón onde se celebró una concentración que remató nuna manifestación pacífica pel centru de la ciudá hasta llegar a la Casa Sindical na Cai Sanz Crespo, encabezada por una pancarta que ponía "72 h. Incomunicáu - Fer llibertá". Na concentración tuvo presente la madre del deteníu, que, anque desbordada pola situación, pidió que les fuerces policiales tuvieren consideración cola familia nún momentu como esti. Dase amás la circunstancia de qu'el padre de Fernando G.R. sufre una enfermedá grave.

El colectivu de familiares y amigos del deteníu fizo públicu un comunicáu en que piden que termine la situación d'incomunicación que sufre'l deteníu y piden que pase a disposición xudicial. Amás d'ello, el colectivu d'allegaos a Fernando G. R. denunció que la nota de prensa de Delegación de Gobiernu, na que se declara que Fernando tenía tratu cola redolada d'ETA y na que se-y acusa de 18 ataques con aparatos esplosivos, nun pretende otro que "condenar a priori a Fernando énte la sociedá valtando'l so derechu a la presunción d'inocencia". D'otra manera, les declaraciones de delegación de Gobiernu tán pa esti colectivu "estraes de suposiciones ensin fundamentu" que pretenden "sobredimensionar el tema ensin prebes pa ello acusándolu de delitu de terrorismu p'asina poder llevalu l'Audiencia Nacional y espurriendo'l tiempu d'incomunicación". Los familiares y amigos del deteníu temen polo que-y pueda tar pasando dientro de les comisaríes al nun haber contactu con elli y llamenten que dende les instituciones de gobiernu "s'intente criminalizar les idees polítiques de Fernando y les organizaciones en que militó".