Falláronse los premios de Xeira y El Garrapiellu

La otra selmana, dos asociaciones culturales asturianes anunciaron los ganadores de los sos respectivos concursos lliterarios.

D'una parte, el tradicional concursu de rellatos curtios de la Tertulia Cultural El Garrapiellu quedó con un premiu por entregar. Ello ye que ye la primer vez en tolos años que l'asociación xixonesa lleva faciendo'l concursu que'l primer premiu queda ermu por nun tener calidá abondo los orixinales presentaos. Con too y con ello, el segundu premiu foi pa Constante Álvarez, conocíu escritor aficionáu que va tiempu espublizare la novela electrónica per entregues "man-u-mitus".

En segundu llugar, pero non por ello menos importante, l'asociación cultural eonaviega "Xeira" entregó tamién en A Caridá el premiu del concursu de narraciois curtias, que nació va yá doce años cola intención de normalizar l'usu lliterariu de la fala de la zona. Los miembros del Xuráu, Rafael Cascudo Noceda, Manuel García Galiano, J.M Martínez Castro y Alfredo Fernández "Fredo el de Carbelle" alcordaron dá-y el premiu, dotáu con 500 euros a Alba González Fernández pol cuentu "Dos tempos, os miyores". La ganadora, una revelación nel ámbetu de les lletres eonaviegues, ye natural de Valdepares y namás tien que 17 años, estudiando anguaño segundu de bachilleratu artísticu nel institutu d'El Franco.