Falanoncaduca ofrez dos temes pa descargar del so discu

|

El pasáu 1 d’avientu salió a la cai “Tiempu de povisa”, el discu debú del grupu de rock n’ast Falanoncaduca. El portal Fnast.net ofrez en descarga dos de los trece cantares que formen esti trabayu asoleyáu por Algamar Producciones.

El grupu con componentes de L.lena, Uviéu y Xixón, Falanoncaduca, presenta en “Tiempu de povisa” la evolución de trés años de trabayu, un EP autoeditáu, numberosos, cambeos na formación y un soníu más curiáu y definíu. Esti primer discu confirma a Falanoncaduca como una de les moces bandes referenciales dientro del rock fecho na nuesa llingua.

“Tiempu de povisa”, títulu estrayíu de versos de la escritora asturiana Mª Teresa González, reflexa la propuesta musical del llamáu “Mecigayu Son”, etiqueta so la que “Fala Non Caduca” define'l so soníu caracterizáu pola fusión de distintos ritmos como'l ska, el rock, surf, reggae, folk o inclusive los ritmos llatinos.

“La so galbana” y “Tiempu de povisa” son los dos cantares que’l grupu pon n descarga al traviés del portal musical Fnast.net. Dos temes onde se recueye l’eclécticu soníu de Falanoncaduca y les lletres que falen la realidá social y cultural de l'Asturies de güei, de conflictos llingüísticos, o del desamparu de la naturaleza virxe. Pesie a too, la banda nun reflexa una situación de derrotismu sinón que llama a actuar pa camudar la realidá.

Esti trabayu discográficu, editáu por Algamar Producciones, foi grabáu n'Avilés nos estudios ACME, cola producción musical de Miguel Herrero, y nél collaboraron músicos como Iñaki “Betagarri”, Mapi Quintana, GPS Proyect, Fabián Díaz y Miguel Herrero.

Espicha-presentación
El próximu 17 d’avientu “Tiempu de povisa” va tener la so presentación en directo al traviés d’un conciertu-espicha. L’actuación musical va tener llugar a les 20.30 nel Teatru Vital Aza de La Pola L.lena (entrada llibre) nun conciertu únicu que va marcar l'entamu de la xira de presentación d'esti primer trabayu de Fala Non Caduca.

Tres del conciertu, va celebrase una espicha na mesma llocalidá l.leniza. Pa la convocatoria va ponese en marcha un bus d’ida y vuelta que pase per Xixón y Uviéu. El preciu total ye d’ocho euros y los interesaos puen apuntase hasta’l 15 d’avientu.
 

Contador Estadistiques