“Facienda realizará un análisis del impautu económicu de la cooficialidá cuando contemos con un modelu sobre’l que trabayar”, diz Cárcaba

|
Ana Cárcaba Plenu entruga informe oficialidá

La conseyera de Facienda aseguró nun conocer l’informe sobre la oficialidá na primera de les trés entrugues plantegaes pol PP al respeuto na primer sesión del Plenu de la Xunta Xeneral. “Nesti momentu nun tien nenguna utilidá pa la conseyería”, dixo Ana Cárcaba, qu’apuntó se “realizará un análisis del impautu económicu d’esa cooficialidá cuando contemos con un modelu sobre’l que trabayar”.

La pregunta urxente llanzada por Pablo González Menéndez céntrabase en si la conseyera “yera conocedora del informe denomináu ‘Estudiu sobre'l marcu afayadizu pa la planificación y desarrollu de la normalización del usu de la llingua asturiana y el gallego-asturianu nel ámbitu del Principáu d'Asturies’ cuando s’ellaboró’l Proyeutu de Llei de Presupuestos Xenerales del Principáu d’Asturies pal añu 2022”. “Non, nun conocía l’informe al que fai referencia nel enunciáu de la so entruga. Escápaseme, sicasí, cuála ye la relevancia que pudiera tener”, respondió la responsable de Facienda.

El popular acusó al presidente Adrián Barbón de “mentirosu” y a Cárcaba de “irresponsable”. “Nun ye creíble que nun valorasen el costu y la incidencia de la oficialidá del asturianu vustedes que son un gobiernu que faen planes, mapes y estratexes pa too”, rescampló.

“Tamos falando d’un informe, un informe similar al que faen toles conseyeríes de l’Alministración en dalgún momentu”, retrucó la conseyera, qu’apuntó que “nesti casu, polo que sentí, los plantegamientos que recueye nun son mui coincidentes coles premises que fixo públiques el nuesu presidente”. “¿Cuála ye la utilidá d’esi informe pa la conseyería de Facienda? Porque-y aseguro que nesti momentu ye nengún. La Conseyería de Facienda realizará un análisis del impautu económicu d’esa cooficialidá cuando contemos con un modelu sobre’l que trabayar, cuando tengamos una propuesta. Previamente ye necesario que se llegue a un alcuerdu ente los grupos parllamentarios d’esta Cámara, y será entós y sólo entós cuando realmente faigamos un análisis económicu rigurosu de cuál ye esi impautu en términos de gastos y en términos d’ingresos”, esplicó.

Por último repitió que “nun conocía l’informe, desconózolu, pero ye que tampoco veo cuála ye la utilidá de que la Conseyería de Facienda contase con esti documentu, nin naquel momentu nin nel momentu actual”.

Na imaxe, Cárcaba. Semeya obra d'Armando Álvarez.

Contador Estadistiques