Euskaltel merca Telecable por 686 millones d’euros

|
Euskaltel merca Telecable por 686 millones d’euros

La compañía de telecomunicaciones vasca Euskaltel ye la propietaria nueva de Telecable tres zarrar la so merca cola británica Zegona Communications por 686 millones d’euros. Esta operación llega añu y mediu depués de facese cola gallega R.

Grupo Euskaltel, poro, da’l pasu pa convertise nel gran referente de les telecomunicaciones del norte del Estáu. Esta operación, sicasí, nun va facer desapaecer a Telecable, yá que “el Grupu nuevu va caltener el caráuter local de Euskaltel, de R y de Telecable, lo que se traduz na continuidá de les sos respeutives marques y equipos profesionales n’Euskadi, Galicia y Asturies”.

Según l’alcuerdu anunciáu güei, la firma vasca faise col 100 por cien del control de Telecable, compañía valorada en 686 millones d’euros, incluyendo una deuda de 245 millones estimada a fecha del 30 de xunu d’esti añu, “con una contraprestación de 186,5 millones de euros n’efeutivo y 26,8 millones de aiciones ordinaries d’emisión nueva que serán suscrites por Zegona a un preciu de 9,5 euros por aición (254,6 millones d’euros), lo que representa el 15 por cientu del capital social d’Euskaltel tres l’ampliación de capital, que tendrá que ser aprobada pola próxima Xunta Xeneral d’Aicionistes”, anunció la compañía. La firma británica va contar con un puesto nel conseyu d’alministración del Grupo Euskaltel.

“La nuesa intención ye caltener los valores de cada compañía, como son les marques y el talentu de les sos persones, porque son les claves del so ésitu”, espresó’l presidente del Grupo Euskaltel, Alberto García Erauzkin. Mentes, Eamonn O'Hare, presidente y CEO de Zegona, apuntó que “Euskaltel ye mui sensible a les necesidaes llocales n’Asturies y podrá ofrecer el soporte y apoyu necesario a Telecable y al so equipu”.

Contador Estadistiques