Europa pon-y 500 millones de multa a Microsoft

La Comisión Europea ta acabante de dar anuncia de que Microsoft va tener que pagar una multa de 497 millones d'euros por "posición dominante" en territoriu europeu. Ye la mayor mayor multa qu'enxamás-y punxere a una empresa la UE dempués de la sanción que-y cayó a la multinacional farmacéutica Hoffmann-la Roche. Xunta la multa, Bruxeles va obligar a la multinacional de Redmon a tomar una serie de midíes pa favorecer la competencia nel sector.

En rempuesta, Microsoft yá dio anuncia que va da-y guerra en xulgáu a la Comisión. La compañía de Bill Gates va pasar de negociar col eurocomisariu de la competencia Mario Monti a recurrir la sanción nos Tribunales de Xusticia de la Xunión Europea. Según la empresa d'informática lo que ta en xuegu ye'l derechu de la propiedá intelectual.

Ello ye que dempués de cinco años d'investigación la Comisión Europea llegó a la conclusión de que la compañía de Bill Gates ta incumpliendo la normativa comunitaria, y obliga a Microsoft a camudar el so modelu de negociu al menos en Europa. Pa entamar Microsoft va tener qu'afaya-y l'usu de Windows a la competencia y nun va poder enxertar nel sistema operativu Windows programes nuevos. Nun plazu de 120 díes Microsoft va tener que compartir la información técnica del usu del Windows de forma que los servidores de los rivales seyan compatibles con Windows. Nun plazu entovía más curtiu, de 90 díes, Microsoft tien obligación de sacar al mercáu européu una versión nueva de Windows que nun lleve arreyáu el reproductor multimedia Windows Media Player, que se considera que-yos fae una competencia deslleal a los demás reproductores multimedia qu'hai en mercáu al venir como "opción por defectu" al cargar el Sistema Operativu.

La multa sentó-y mal a Microsoft poles implicaciones que tien y porque asitia un precedente llegal, pero no que ye l'asuntu económicu nun ye que-y vaya quitar el suañu a Bill Gates. Con ser una multa histórica y la de mayor importe que nunca nun se-y punxere a una empresa, los 500 millones d'euros son una caxigalina pa Microsoft, que tien unos recursos que multipliquen por 100 esa cantidá.