ETA abre otra vuelta la crisis en Cataluña

L'anuncia de declaración de tregua en Cataluña que fizo ayeri la organización terrorista ETA revolvió otra vegada'l nomáu "asuntu Carod Rovira" y ye güei la noticia del día en toles portaes. En conociéndose l'anuncia d'ETA, el PP pidió otra vegada que rompiere'l tripartitu, amenazando con abandonar la mesa antiterrorista si'l PSOE nun francía'l pautu con ERC y IC-Verts en Cataluña. El candidatu socialista a la presidencia del Gobiernu, Rodríguez Zapatero, esixó-y tamién a Maragall l'abandonu del tripartitu. Dirixentes del PP, como'l ministru de Xusticia Ángel Acebes acusen directamente a Carod d'apautar "alcuerdos" con ETA na reunión secreta que tuvo'l políticu catalán a primeros d'añu cola dirección d'ETA, una acusación que'l dirixente d'ERC niega dafechu. ERC sofitó a Carod con un comunicáu diciendo que l'anuncia d'ETA ye una trampa política

Dempués d'una mañana entera de declaraciones y comunicaos dacuando contradictorios, yá se conocen les primeres consecuencies del espolín mediáticu y políticu que siguió a l'anuncia d'ETA. D'una parte, la comisión de siguimientu del Gobiernu catalán, qu'enxerta representantes de les trés formaciones del executivu catalán espublizó un comunicáu en que dende la solidez del tripartitu "contra la ofensiva de la derecha más reaccionaria".

Con too y con ello, la crisis llevó a Carod-Rovira a dexar pa prau la posibilidá de tornar otra vuelta a ocupar el cargu de "Conseller en Cap" qu'abandonare cuando s'asoleyó lo de la entrevista con ETA. Anque l'anuncia entovía nun ye oficial, el diariu dixital catalán Vilaweb diz qu'ERC ta acabante de proponer a Josep Bargalló como nuevu Conseller en Cap nun intentu porque la vida política de la Generalitat torne a la normalidá dempués de los ximielgones que ta llevando con tou esti asuntu. Carod Rovira, pela so parte, sigue como númberu ún na candidatura d'ERC al congresu español, au una encuesta del diariu La Vanguardia diz que la formación independentista pue sacar hasta siete escaños nes votaciones del 14 de marzu.