Ésti ye'l programa definitivu de la xornada '8S de Soberaníes' d'Aína

Va celebrase n'Uviéu coincidiendo cola celebración del Día de la Nación Asturiana.

Esti vienres ye'l 8 de setiembre y Aína va arrancar el cursu políticu col entamu de la xornada '8S de Soberaníes'. Va ser dende'l meudía en La Casona de la Montaña y ta abierta a militantes y simpatizantes de la formación asturianistas de creación nueva.

L'actu va abrise con una entrevista d'Isabel Á. Fernández al escritor, llingüista y académicu David Guardado sobre la so obra 'Nunca vencida. Una historia de la idea d’Asturies', esitosu ensayu editáu por La Fabriquina que yá va pola so segunda edición. Darréu Silvia Fernández, Iyán González y Claudia González van reflexonar sobre l’estáu de l’Asturies d’anguaño y les soberaníes a les que tien qu’aspirar el so pueblu nel actu políticu 'Atiendi, Asturies, atiendi', nel que se va plantegar tamién un alderique sobre’l "significáu que tien el 8 setiembre pa les instituciones y la población asturiano y qué situación se dibuxa nel nuestru panorama políticu pa esta llexislatura".

La xornada va completase con una espicha, una actuación musical de Nacho Vegas, una sesión de DJ Sandrasian d’Abres y actividaes pa la reciella, allargando la folixa hasta media tarde col escanariu abiertu pal baille. La xente que quiera xintar nel llugar tien hasta mañana pa facer el pagu de 20 euros, qu'inclúi tortiella de pataca, ‘nachos’ con quesu y ‘guacamole’, croquetes de xamón, chorizos a la sidra, deos de pitu, pataques con trés salses y frixuelos, amás de sidra, agua y cerveza, cola posibilidá d’opciones alternatives a la carta.

Na semeya, carpeta del congresu fundacional d'Aína sobre un panderu.