Esti domingu arranca’l ciclu de charres ‘El Parque Histórico Fala’

La Fundación Parque Histórico del Navia entama esti domingu en Grandas de Salime’l ciclu de charres en gallego-asturiano ‘El Parque Histórico Fala’. El fisioterapeuta y investigador franquín Martín de Villar ye’l primer convidáu.

L’oxetivu d’esta iniciativa ye la de tratar dellos aspeutos culturales de la zona na llingua del llugar cola collaboración d’espertos y investigadores. Asina, los nueve conceyos qu’integren el territoriu del Parque Histórico van acoyer nos meses próximos charres que pretenden tocar temes como “a presencia del gallego-asturiano en Internet; a bruxeiría en Asturias; el estraperlo y el contrabando na postguerra da nosa comarca; os oficios tradicionales; a música contemporánea en gallego-asturiano; a caza da ballena nas nosas costas; un repaso pol hestoria del teatro en gallego-asturiano y, xa por último, poderá verse úa mostra de producción audiovisual y musical na nosa fala”, detallen dende la organización.

La melecina popular va protagonizar la primera de les conferencies, que va tener llugar el domingu, a partir de les 13 hores, na Casa da Cultura de Grandas de Salime, coincidiendo cola celebración del Feirón de Verano, que se fai nesti conceyu cada segundu domingu d’agostu. El convidáu pa impartir esta charra, entitulada ‘Melecía popular en Grandas y alredores’, ye’l franquín Martín de Villar. Nella, el fisioterapeuta y investigador “vai fer un repaso por algúas das personas y os métodos de sanación que tradicionalmente se conoceron en sitos como el conceyo de Grandas, Pezós ou Samartín d’Ozcos”.

El domingu siguiente, día 18, Tapia va recoyer el relevu cola conferencia ‘El galego-asturiano na rede’, a cargu d’Ágata García Castro, profesora del IES Marqués de Casariego. Ésta va tener como sede l’Auditorio da Casa da Cultura a les 20 hores.