“Esti discu costó dominalu, pero quedó como queríamos que quedara”, apunta Maxi Areñes

|
Maxi Areñes videu Fontoria 'El máxicu viaxe de Fionna de Morlay'

Fontoria presenta esti domingu en L’Infiestu’l so segundu trabayu, 'El máxicu viaxe de Fionna de Morlay', un discu conceptual de 72 minutos de llargor que “nos costó dominalu, pero quedó como queríamos que quedara”. Maxi Areñes, cantante y productor del trabayu, fala nun videu p’Asturies.com sobre esta gran historia.

“Ye un discu nel que vais atopar reminiscencies barroques, renacentistes, medievales…, sobre manera na suite que se llama ‘Fionna’, que ta dividía en siete movimientos. Tamién cancios y temes que van dende sones más de raíz, inclusive temes que podíes tar sonando nun pub del Soho londinense a les 3 de la mañana, siempre con esa raíz tradicional”, esplica’l músicu. Asina, considera que tien soníes que pueden-y prestar “a la xente que-y guste la primer dómina de Genesis con Peter Gabriel, a la que-y guste el folk-rock primixenu de los últimos, la música clásica… Hai un batulaxe ehí mui guapu”, afirma.

Con formación nueva compuesta por Nagore Goikolea (harpa, vigulín, viola, clave y pianu), José Ramón 'Navia' (gaites, xiblates, flautes de picu y curdión), Pablo Pumarada (bodhran, percusión ellectrónica, djembé y darbuka) y el propiu Maxi Areñes (voz, guitarres, baxu, teclaos, banjo, harpa, mandulina, gaita rabil y xiblates), Fontoria va llevar los cantares d’esti discu “que s’entamó a xestar namás salir el primer, anque la primer idea que yo tenía yera facer una novela”, a la Plaza'l Ganáu de L'Infiestu, a les 19 hores nuna actuación de baldre con toles midíes de seguranza con entraes que yá se pueden acutar na Casa Cultura (teléfonu 985.71.11.33). 'El máxicu viaxe de Fionna de Morlay' yá ta la venta en Musicasturiana o al traviés del propiu grupu, amás de disponibles nes principales plataformes dixitales.

Contador Estadistiques