Espublízase ‘Esti neñín (Añada de Cardo)’, cantar grabáu por Elías García nel 2019 pa un proyeutu con Bada y Pepín de Muñalén

Rubén Bada y Pepín de Muñalén espublizaron esti sábadu el cantar ‘Esti neñín (Añada de Cardo)’. Los dos intérpretes grabaron nel 2019 xunto col músicu y ornitólogu, esta fin de selmana na mente de toos poles xornaes d’homenaxe entamaes por familia y collacios en Villaviciosa, esta pieza pa un proyeutu en común.

L’añada de la zona de Peñes, bien conocíu nel llugar gozoniegu de Cardo, formaba parte del repertoriu de Bada y García, que preparaben un trabayu a dúu. Sicasí, ésti evolucionó hasta un cuartertu xunto con Pepín de Muñalén, a la flauta, y René Ispierto, al contrabaxu, llegando inclusive a dar un conciertu enantes d’aquel fatídicu día de setiembre de va agora trés años.

D’esos trabayos previos quedó guardáu esti cantar inéditu, qu’agora los músicos quieren compartir con tolos asturianos. ‘Esti neñín (Añada de Cardo)’ va formar parte del primer trabayu en solitariu de Bada.

Na semeya, Ispierto, Pepín de Muñalén, Bada y García.