Espublicen una tesis doctoral sobre la música popular de L.lena

El conceyu de L.l ena y el Muséu del Pueblu d'Asturies andechen na edición d'un llibru sobre la música de tradición oral nel conceyu. El trabayu, obra de María del Carmen Prieto, presenta un cancioneru con 443 partitures, únicu hasta'l momentu n'Asturies

"Música de tradición oral en el concejo de Lena", ye'l títulu de la tesis doctoral que presentó na Universidá d'Uviéu la investigadora l.leniza María del Carmen Prieto González y qu'agora va convertise nun llibru al alcance de tolos públicos. Esta tesis doctoral ye un estudiu exhaustivu sobre la música de tradición oral nel conceyu con una metodoloxía na que la investigación de campu, entrevistando a los vecinos del conceyu, foi básica pa conseguir una obra final qu'enxerta 443 partitures. El Ministeriu de Cultura reconoció'l valir del llabor de la investigadora asturiana concediéndo-y a esta tesis doctoral el tercer puestu nel prestixosu Premiu d'investigación cultural "Marqués de Lozoya" y agora, el Muséu del Pueblu d'Asturies va asoleyar esti estudiu dientro de la colección "Fontes pal estudiu de l'antropoloxía asturiana" contando la edición con un prólogu del profesor d'Antropoloxía Social de la Universidá de Murcia Ángel Montes del Castillo.