Espolín na enseñanza

La situación sigue revuelta nel sistema educativu asturianu, onde'l sindicatu SUATEA respondió con muncha dureza a les declaraciones del Presidente asturianu nes qu'afirmaba que gracias a la so política se llegare a un equilibriu ente la rede pública y la privada concertada.

Al paecer del sindicatu d'enseñanaza esi "equilibriu" ente redes consíguese pagando'l preciu d'una gran perda de puestos de trabayu nel sistema públicu y de l'apioramientu de les condiciones de trabayu de los que trabayen nesi sistema. Otramiente, la organización acusa al Principáu y de renova-yos los conciertos a centros nos que se discrimina al alumnáu por razones de sexu. Paralelamente, Suatea denuncia que tan desmantelándose centros escolares públicos y privatizándose los sos espacios. El sindicatu llama l'atención nesti particular sobre l'IES Universidá Llaboral de Xixón, del que diz que ta acabante de camudase otra vuelta'l plan d'usos ensin conocimientu de la sociedá p'atechar nel edificiu, amás del hotel y l'aparcaderu particulares que yá taben planeaos, oficines de l'Alministración del Principáu. Xunta esto, l'históricu centru va perder espaciu físicu nel que poner los cursos de FP, dellos únicos n'Asturies.

La crítica del sindicatu estiéndese a los trés partíos en Gobiernu asturianu, a los qu'acusa d'incumplientu de los sos propios programes electorales no que cinca a la defensa del enseñu públicu. Suatea denuncia que nes xuntes cola Conseyería de Educación l'alministración escuende les llinies de planificación educativa pa los cursos próximos, colo que munchos docentes entovvía nun saben qué ye lo que van facer el cursu qu'entra. Esta falta de tresparencia estiéndese a la convocatoria d'oposiciones, que yá tan convocaes en casique toles comunidaes mientres que n'Asturies entovía nun se sabe cuantes places van ponese a concursu. Respective a los decretos pa l'aplicación de la Llei de Calidá, el sindicatu diz que demuestren " el servilismu más puru pa coles patronales católiques de la enseñanza concertao"