España y la UE apreben más máiz tresxénico

Organizaciones ecoloxistes y sindicatos agrícoles denunciaron esta mañana que la Unión Europea podía acabar cola moratoria que vien faciendo sobre los tresxénicos, autorizando, dende esti mércoles qu'entra la importación del maíz de la clase NK 603 un productu de la casa Monsanto preparao pa ser compatible col herbicida a base de glifosato Roundup. Amigos de la Tierra, Ecoloxistes n'Acción, Greenpeace, CECU, COAG, Plataforma Rural y SEAE tienen mieu de que'l Gobiernu Español pida al so representante permanente en Comité Regulador que vote a favor de l'aprobación del maíz, y ye que'l Gobiernu español dio de pasu güei'l cultivu d'otres 9 variedaes tresxéniques de maíz distintes a les que se planten dende 1998

Precisamente nel 1998 foi cuando la UE punxo l'actual moratoria sobre tresxénicos, un frenu a la entrada incontrolao d'unes especies de les que nun se conocíen como podíen repercutir nel mediu ambiente nin qu'efectos podíen tener sobre la salú en casu d'entrar a la cadena alimentaria. Les organizaciones que protestaron güei pola entrada d'esta clase nueva de maíz entienden que dalu de pasu diba suponer llenda-yos la capacidá d'escoyer a los agricultores, sobremanera a los que trabayen l'agricultura ecolóxico, un sector que ta xubiendo y que ye'l más dañáu pola entrada d'estos productos alteraos xenéticamente.

Les organizaciones dicen tamién que la priesa por aprebar esti maíz nuevo foi tan grande que la tramitación fízose acordies al reglamentu vieyu de d'Alimentos y Piensos modificaos xenéticamente, cuando ta tramitándose un documentu nuevu y actualizáu que meyora los conteníos y disposiciones del vieyu. Otramiente, los papeles que presentó la casa Monsanto y el mesmu dictame de l'autoridá Europea de Seguridá Alimentaria sobre esti maíz sedríen incompletos, faltando análisis tóxico-acumulativos, alerxénicos y estudios sobre secuencies d'ARN indeseaes qu'apaecieron nesti maíz.

Otramiente, les organizaciones que protesten contra'l NK 603 dicen que la UE nun ta preparada pa la entrada masivo de tresxénicos al mercáu en cuantes que nun va haber una llexislación d'etiquetao apropiada hasta'l 18 d'abril. Nel casu español esto ye más grave, porque les alministraciones del estáu nun tan en condiciones de dar la "trazabilidá" -ello ye,, el camín dende la esplotación d'orixe hasta la balda del supermercáu- de los productos alimentarios

Esta entrada d'una nueva clase de maíz tresxénico enxértase pa ecoloxistes y sindicatos agrarios nun marcu más grande p'afalar la entrada de tresxénicos. La permisividá ye una de les ferramientes d'esta estratexa que se traduz nel casu español en que'l ministeriu incumpla los rexistros de campos semaos con tresxénicos, xenerando una polémica que chiscó a Asturies, onde conocimos va mes y mediu que teníemos praos semaos de maíz alterao.