Escándalos financieros

La xuba de la moneda europea aposentó la selmana pasada, siendo la primer vegada en meses que l'euru peslló en negativo. Anque la divisa perdió la cota de los 1,25 dólares, l'euru sigue siendo'l mayor problema del Bancu Central Européu (BCE) tal y como dio anuncia'l presidente d´esti organismu, Jean Claude Trichet. Los mercaos internacionales tuvieron una selmana positiva marcada polos problemes d'auditoría de la suiza Adecco. Col casu Parmalat ensin pesllar, otra empresa europea sigue'l camín d'estafes contables propies de les compañíes norteamericanes como Enron. Mentantu, el selectivu Ibex-35 nun ye a garrar fuercia pa asitiase penriba los 8.000 puntos.



Les estadístiques del otru llau del Atlánticu foron les más importantes la selmana pasada. Tolos datos que vinieron d´Estaos Xuníos foron toos ellos bonos y meyores de lo que contaben los analistes. Contra ello, les bolses europees sescudioles la selmana pasada un supuestu escándalu na empresa suiza Adecco. Anque los parqués del Vieyu Continente pesllaron la selmana en positivo, el casu Parmalat puen amestáse-y agora otros dos cola entrada del "casu Adecco" y tamién del "casu Tiscali", empresa italiana acusada d'entrampiar la contabilidá. En Wall Street tornó la confianza nel sector tecnolóxicu gracies a los perbonos resultaos d'empreses tan representatives como Yahoo, Sun Microsistems o Jupiter Networks. Asina'l vienres pasáu l'índiz tecnolóxicu Nasdaq algamó los 2.140,46 puntos gracies a una xuba del 1,49%. Na mesma llínea, el Dow Jones llegó a los 10.600,51 puntos con una xuba del 0,44%.

La Bolsa de Madrid tuvo una bona selmana gracies al emburrión de les bolses europees a final de selmana. Pero entovía se-y resiste al Ibex la cota psicolóxica de los 8.000 puntos. Al final l'Ibex peslló'l vienres en 7.979 puntos con una xuba nel conxuntu la selmana del 0,69%. Asina la bolsa madrilana tien la sétima selmana en positivo. La selmana pasada foi ensin dulda la de les empreses mediátiques de Jesús Polanco: Prisa y Sogecable foron los valores con más xuba, cerca del 4%. Tamién medraron a esgaya Sacyr-Vallehermoso y el BBVA. Nel terrén de les perdes destacaron Gamesa, Iberia, Altadis, Repsol y Endesa. El Grupu Telefónica tuvo un resultáu mistu ente les ganancies de TPI y les perdes de la matriz.

L'euru, la estrella de la xuba, cayó por fin. Esta corrección técnica influyó sobremanera sobre los parqués bursátiles mundiales. Dellos fondos d'inversión entamaron a recoyer los beneficios de la sobrevaloración de la moneda europea que, xunta les presiones polítiques xurdíes del BCE p'atayar la xuba, ficieron que l'euru llegare hasta los 1,24 dólares. Al Fondu Monetariu Internacional (FMI) tampoco nun-y presta'l cambéu ente euru y el dólar, yá que supón un altu riesgu pal crecimientu mundial. El vienres pasáu l' euru teminó nos 1,25 dólares.

Ensin dulda, la selmana pasada tuvo mui tensa nos mercaos. Dempués de que´l presidente del BCE ficiere públicu'l peligru de l'alta volatilidá nos mercaos de divises, l'economista xefe del mesmu organismu, Otmar Issing, dio anuncia de que la inflación taba controlada, pero los inversores pescanciaron qu'estes anuncies yeren un avisu de prósima xuba nos tipos d'interés.
El petróleu recuperó la marca de los 30 dólares barril colo qu'entovía ta lloñe de los 22-27 dólares recomendaos por organismos internacionales. L'informe mensual de l'Axencia Internacional de la Enerxía xunta les previsiones de cayíes nes reserves enerxétiques de los Estaos Xuníos tiraron p' arriba de la cotización del oru prieto. Según esti informe la OPEP vendió n'avientu 27,95 millones de barriles diarios. Otramiente, la renta fixo tuvo una selmana de más a menos. El vienres pasáu la rentabilidá de los bonos alemanes algamó'l 4,165%. L´oru tuvo una selmana con pieslle negativu al trancar perbaxo los 410 dólares la onza.