ERC refuérzase en Cataluña

El domingu foi un gran día pa los partíos nacionalistes d'izquierdes fuera d'Asturies. Sacantes el fracasu del BNG, que perdía cerca de 100.000 votos por efectu de la rabasera de votu útil al PSOE, o'l recule de CiU, toles demás opciones nacionalistes y autonomistes del estáu xubieron enforma y algamaron resultaos muncho meyores que los de va cuatro años. La Chunta Aragonesista ganaba votos enforma afitando l'escañu. N'Euskadi, mientres el PNV consiguía'l meyor resultáu de la historia nunes xenerales, Aralar raspiaba'l 6% en Guipuzcoa y la coalición Nafarroa Bai, qu'enxerta al PNV xunta Eusko Alkartasuna, Aralar y Batzarre entraba al Congresu por Navarra.

Sicasí, el mayor trunfu yera'l d'Esquerra Republicana de Catalunya, que se convertía na cuarta fuerza política del estáu y pasaba d'ún a 8 escaños, valtando tolos pronósticos, que poníen al partíu de Carod Rovira en 6-7 escaños. Dempués de pasar con nota la preba electoral trés de la polémica pola entrevista con ETA, el secretariu xeneral d'ERC podría abandonar l'acta d'escañu en Madrid pa centrase na política catalana. Ello ye lo que se ruxe per dellos medios catalanes, como La Vanguardia, que daba la noticia esti día a páxina completa, o Vilaweb, que foi el primeru en dar la noticia al día dempués de les elecciones. El diariu catalán esplicaba tamién que l'asientu que dexare llibre Carod diba ocupalu Agustí Cerdà, presidente d'Esquerra del País Valenciá, númberu cinco na llista por Barcelona d'ERC y qu'asina sedría'l primer diputáu valencianista de la historia.

La dirección d'ERC decide esti llunes si Carod-Rovira toma posesión del escañu en o si queda col del Parlament, en cuantes que tener los dos ye incompatible. Col estatutu d'autonomía nuevu pa Cataluña en procesu y col sistema de financiación por volver a negociar, tener la figura de Carod pue ser básico pa los propósitos de la fuerza nacionalista d'izquierdes protagonista del mayor reblagu en representación. Por Carod quedaría al frente del grupu parllamentariu d'ERC en Madrid Joan Puigcercós. Otru asuntu distintu sedría la vuelta de Carod al Gobiernu catalán, onde de momentu paez que va siguir Josep Bargalló.

Esquerra tuvo nes autonómiques del 2.003 un total de 540.000 votantes y entró al executivu catalán. Trés del escándalu pola entrevista de Carod Rovira cola banda terrorista ETA, que forzó la salida del gobiernu del líder d'ERC, Carod decidió presentase candidatu al parlamentu español. El referendum a la so persona en que se convertieron, en cierta midida, les xenerales en Cataluña, saldóse con 640.000 votos y 8 escaños. De facer too esto, l'oxetivu d'ERC paez evidente: reforzase en Cataluña y aspirar a un meyor resultáu nes siguientes elecciones catalanes.