Entamó'l cursu de la Llei de Calidá

El cursu escolar entamó la otra selmana
nes escueles asturianes con 3.123 alumnos menos matriculaos que
l'otru añu, colo que la tendencia a la baxa sigue un añu
más, anque queda nel 2, 32% en cuenta del 5% que llegó a alcanzar
otros años. Contra lo que se dicía, nin siquiera la
matriculación d'escolinos fíos d'inmigrantes valió
p'atayar la baxada productu de la cayida demográfica. Sicasí, la noticia nel entamu del cursu nun tuvo tanto nesta
estadística como en qu'esti foi el cursu en qu'echó a andar la
Llei de Calidá del Ministeriu d'Educación. L'executivu estatal
empondera la llei, de la que destaca qu'incorpora un sistema nuevu más precisu de
calificaciones na ESO xunta'l fin de la promoción automática y tamién qu'aplica la gratuidá de la enseñanza infantil.

Contra estos argumentos, el sindicatu asturianu d'enseñanza Suatea dio una rueda de prensa esti xueves na que denunció que les supuestes bondaes de la Llei de Calidá nun son tales y que la realidá que'l Gobiernu nun diz ye que la llei manda un sistema d'itinerarios educativos qu'empobinen a los escolinos a destinos profesionales y a horizontes formativos llendaos que puen valir dende una óptica d'aprovechamientu empresarial del sistema educativu pero que nun garanticen una formación completa del individuu y que respuenden a un marcu ideolóxicu neolliberal que lo que quier ye mercantilizar la enseñanza.

Nel planu ideolóxicu, tamién llamaron l'atención na rueda de prensa sobre la presencia de la relixón como asignatura que cuenta pa les calificaciones, cosa que-y abulta a SUATEA un retrocesu al réxime nacionalcatólicu, denunciando amás que'l programa de l'alternativa a la relixón parezse enforma al de la propia asignatura de relixón, lo que ye una de les munches trampes qu'escuende la redacción de la llei. Sobre les estadístiques que dicen que la concertada perdió más alumnos que la pública, los representantes sindicales dixeron qu'eses informaciones tan remanes de manera interesada a partir de datos parciales y que en realidá la que pierde más alumnos ye la pública, esactamente, el doble que la concertada.

Otramiente, los representantes de SUATEA declararon que'l primer cursu escolar col nuevu gobiernu autonómicu nun entamó bien. Según esplicaron, el cursu entamó con una conculcación total de los derechos llaborales que se traduxo en vacantes mal adxudicaes y cambeos de destinos en menos de 24 hores ente otres irregularidaes que ficieron del arranque del cursu un allorie de mayestros que tuvieron que tar sollertes a cambeos que s'espublizaben namás n'internet o en llistes de destinos en folios que se pegaben a la puerta d'Educación a les 10 de la nueche.