Entamó la 9 reunión de la ONU sobre cambéu climáticu

Ayeri entamó en Milán la
novena
Reunión de les Partes del Conveniu Marcu de la ONU sobre
Cambéu
Climáticu, na que vuelve a decidise'l futuru del Protocolu de Kyoto. El Conveniu Marcu de Cambéu Climáticu de la ONU aprebose nel Cume de la Tierra de Río de Janeiro nel 1992 y enxerta a 188 países, de los que 120
firmaron el Protocolu de Kioto, documentu que salió d'esti Conveniu y que ye l'únicu instrumentu
llegal
internacional de llucha contra'l cambéu climáticu.
Esti protocolu va entrar en vigor en cuantes que lu firmen 55
países
que sumen ente ellos el 55% de les emisiones de gases d'efecto invernaderu. Anguaño, los 120 países que firmaron el protocolu faen el 44% de les emisiones, colo que la validación final del documentu depende de que lu firme ún de los dos xigantes económicos mundiales, Rusia, que representa'l 17% de les emisiones o los EE.UU, que representen el 36%.

La firma de Rusia espérase dende va tiempu, anque de producise nun diba ser por altruismu. Rusia cuenta con sacar tayada del mercáu d'emisiones de gases contaminantes pol que los países que más contaminen van poder compra-yos derechos d'emisión de gases a los menos contaminantes, ello gracies a que la escangayada economía rusa diba recibir más derechos d'emisión de lo que pue emitir en realidá. Esi nun ye'l xuegu de los EEUU, que siempre arrenegaron del Protocolu de Kyoto en cuantes que va contra los intereses de la so economía. L'Estáu Español llega a esti cume colos deberes ensin facer, depués de comprometese a nun aumentar los niveles de contaminación más d'un 15% respective a los niveles de 1990, los datos del mesmu gobiernu reconocen que los índices d'emisiones espoxigaron un 38%. Organizaciones ecoloxistes denunciaron ayeri que, cola nueva directiva E4 sobre emisiones que s'aprebó la otra selmana, el Gobiernu español, en cuenta d'amenorgar emisiones, cuenta con pegar una xuba del 60% n'emisiones, ello arriendes d'un plan d'infraestructures eléctriques que cuienta con mangar 35.000 MW en centrales térmiques nueves.