Entamó ayeri la vuelta del IRPFa los non contribuyentes

Los contribuyentes que nun tengan obligación de declarar esti añu poles retenciones que se-yos practicaron nel 2003 puen pidi-y a l'Axencia Tributaria (AEAT) la vuelta rápida dende güei llunes. Según Facienda 1,2 millones de contribuyentes, 200.000 d'ellos asturianos, van pidir esti añu la vuelta rápida, un númberu asemeyáu al del añu pasáu. Los reembolsos van entamar a últimos de marzu y Facienda va tar devolviendo perres hasta mayu.

Ye importante conocer que non tolos que piden la vuelta rápida tienen derechu a recibila, asina l'añu pasáu solo s'aceptaron el 70% de les solicitúes. Según fontes de l'Axencia Tributaria los contribuyentes non obligaos a declarar van tar llibres de pagar anque seya'l casu de que nes cuentes-yos dea a ingresar.

Los contribuyentes que pueden solicitar la vuelta rápida son los que nel 2003 tuvieron ingresos del trabayu que nun superen los 22.000 euros al añu si procedíen d'un únicu pagador (o más pagadores siempre que la suma percibida del segundu y siguientes nun superare los mil euros) o que nun superen los 8.000 euros anuales si tuvieron dos o más pagadores. Esti tope de 8.000 euros tamién val pa los contribuyentes que recibieron anualidaes por alimentos (equí nun entren los alimentos de los padres por decisión xudicial), y cuando'l pagador nun tea obligáu a retener.

Nun tan obligaos a declarar y puen pidir la vuelta rápida aquellos contribuyentes que nel 2003 tuvieron ingresos de capital mobiliariu y ganancies patrimoniales sometíes a retención o ingresu a cuenta si nun superaron conxuntamente los 1.600 euros anuales. Los qu'ingresaron por rindimientos de les Lletres del Tesoru o rentes imputaes d'un únicu inmueble o subvenciones pa l'adquisición d'una vivienda de protección oficial o preciu tasáu tampoco nun tan obligaos a declarar con un tope conxuntu de mil euros al añu