Entamen una recoyida de firmes na rede y concentraciones pa frenar la corrida de toros en Benia

|
Plaza de toros portátil en Benia

L’asociación Huellas del Sella repite la campaña de recoyida de firmes qu’axuntó más de 57.000 sofitos contra “la tortura animal en Cangues d’Onís” cola intención de frenar la corrida anunciada pal 20 d’agostu en Benia. ANADEL, pela so parte, concentróse’l vienres na capital d’Onís p’amosar el so refugu a esti eventu priváu.

Los dos coleutivos, al igual que fixeron cola ‘novillada’ de Benia, nun duldaron en movilizase una vez tuvieron conocimientu de la intención d’entamar una ‘Gran Fiesta Nacional de la Tauromaquia’ en Benia, en concretu na finca Morán. Ehí instalóse una plaza portátil la selmana pasada con capacidá pa 3.000 persones pa que salgan al ruedu’l ‘rejoneador’ alicantín Andy Cartagena, el toreru mexicanu Isaac Fonseca y el novilleru castellanu Daniel Medina nuna cita entovía ensin permisu del Gobiernu que yá tien a la venta entraes a 30 euros, a 50 en barrera.

Al Executivu asturianu diríxise la campaña de recoyida de firmes ‘No a la corrida de toros en Onís. Asturies libre de maltrato animal para siempre’ entamada na plataforma dixital Change.org por Víctor Manuel Iglesias y roblada pola asociación protectora d'animales Huellas del Sella. “La tortura animal nun tiene espaciu nuna sociedá civilizada como la que pretendemos ser. Asturies ye un paraísu natural onde enxamás hebo’l más mínimu raigón taurín-torturador. A los asturianos préstanos ver a los nuesos animales pelos montes y praos, non nuna plaza de toros siendo torturaos”, empicipia’l testu de la campaña.

Asina, “esiximos al nuesu presidente, al Conceyu d’Onís y a los diputaos de la Xunta Xeneral d'Asturies que por fin llexislen y declaren a Asturies llibre de maltratu animal y de corríes de toros pa siempre”. La campaña, qu’arrancó ayeri pela tarde, acumula nel momentu de la espublización d’esta noticia 694 firmes y pretende algamar un ésitu asemeyáu a la del añu pasáu cola ‘novillada’ de Mestas de Con, que se suspendió pola negativa del Ministeriu pa la Transición Ecolóxica y el Retu Demográficu, al traviés de la Confederación Hidrográfica del Cantábricu, a l’autorización de la instalación de la plaza al tar catalogada la finca como zona de posibilidá alta d’enllenos.

Nesta ocasión la empresa Tudanca Toros, que nada nun tien que ver cola entamadora de la fracasada ‘novillada’ del conceyu vecín de Cangues d’Onís, foi más previsora y yá tien la plaza instalada dende’l martes pasáu. Namái queda pendienten los permisos del Gobiernu pa dar lluz verde a un eventu taurín que se convertiría nel únicu esistente n’Asturies nel 2022 depués del fin de la xixonesa Feria de Begoña.

Los coleutivos animalistes, mentes, van tratar de facer tolo posible pa que nun se celebre’l ‘festexu’. Amás de les firmes d’Huellas del Sella, l'Asociación Nacional Animales con Derechos y Libertad (ANADEL), cola collaboración de Xuníes Podemos Cangues d’Onís, entamó una pequeña concentración el vienres con motivu de la presentación de la campaña d’ecoturismu gastronómicu n’Onís ‘Productos Quilómetru 0 nuna Tierra de Pastores’, onde recibió l’apoyu d’asistentes nel eventu, y anuncia más aiciones y concentraciones pa estes selmanes.

Na imaxe, plaza de toros portátil instalada na finca Morán de Benia. Semeya propiedá d'ANADEL.

Contador Estadistiques