Entama'l branu de más calor n'Asturies... y parte de la culpa tenémosla nós

El cambéu climáticu dexaráse notar nel branu qu'entama esti domingu a les 18'30 y que va ser el más calurosu nos últimos años según la AEMT

La delegación asturiana de l’Axencia Estatal de Metereoloxía (AEMT) anunció esta selmana que les previsiones que se faen dende l’axencia falen d’un branu nel que va haber dellos díes d’orbayu pero nel que lo que más vamos tener van ser díes de sol.

En concreto Manuel Mora, delegáu asturianu de la AEMT cuenta  que les probabilidaes de qu’esti branu faiga más calor n’Asturies son d’un 40%. Mora, apunta que’l cambéu climáticu ye en parte responsable d’esti fechu yá que " la tendencia esti sieglu ye de temperatures ascendentes”, daqué no que tien responsabilidá l’aición del ser humanu.

Una primavera tamién con más calor

Mora tamién comentó que la primavera qu’acaba agora tamién fixo más calor qu’otros años; la temperatura media foi de 13,1 graos centígrados, que ye un 0,7 más que davezu. Amás, llovió tamién un 19% menos.

Como curiosidá, la temperatura máxima esta primavera rexistróse en Felechosa (Ayer), con 30’3 grados, mientres qu’en Degaña rexistróse la mínima con tuvo la mínima, con 4’1 graos baxo cero.

Semeya de la Playa de San Llorienzo de Roberto Sueiras, distribuyida con llicencia CC BY-SA 3.0