Entama una dómina nueva pal petroleu

Selmana de probetayes xubes énte l'enfriamientu nos mercaos enerxéticos. Les últimes cayíes nes bolses tan animando a dellos inversores a mercar valores a precios bien baxos. La que ya ye nueva crisis del petroleu dio-yos fuelgu a los mercaos cola ayuda de delles estadístiques, anque les duldes sobre la estabilidá macroeconómica nun-y presten a la comunidá inversora.

Nos Estaos Xuníos l'alta creación de nuevos puestos de foi la meyor anuncia de la selmana, calteniéndose la tasa de paru nel 5,6%.

Ente les estadístiques de la Zona Euru destaquen el datu de ventes al por menor d'abril que foi del 1%. Los pidíos de fábrica n'Alemaña medraron el 7,7% y la producción industrial n'España un 1%, toos datos meyores de lo esperao.

Ello llevó a xubes nes bolses del Vieyu Continente. Francfort y París pasaron del +1% gracies al bon comportamientu de los valores tecnolóxicos y les aseguradores. Al otru llau del Atlánticu tamién pintó bien pa Wall Street onde les bones estadístiques d'emplegu animaron los mercaos. L'índiz Dow Jones trancó nos 10.242,82 puntos lo que supón una xuba del 0,46% mentanto que l'electrónicu Nasdaq algamó los 1.978,62 puntos con una medra del 0,94%.

Selmana en positivo na Bolsa de Madrid con una xuba del 1,4% del Ibex hasta algamar los 8.010,70 puntos. Baxu volume de negociu y munches duldes ente los inversores foron les notes más destacaes na selmana nel parqué madrilanu.

Los valores que más ganancies algamaron foron Corporación Financiera Mapfre, Altadis, Ferrovial, SCH, BBVA, Repsol y Endesa. El Grupu Telefónica tuvo una bona selmana con perimportantes xubes de Telefónica Móviles y TPI. Ente les perdes tuvieron valores como Enagás, Acciona y Gamesa.

Los economistes ven claro que tamos nuna verdadera crisis del petroleu. La especulación ta tirando p'arriba polos precios mentanto que los países de la OPEP tan acabantes de dar anuncia tres la reunión del cartel en Beirut que la época del petroleu barato pasó a la historia. L'apueste de la OPEP ye tener una nueva marca de referencia nos 38 dólares barril. Asina la inflación y la desestabilidá macroeconómica tan garantizaes a curtiu plazu en cuantes que los países desarrollaos necesiten pa d'una banda de precios nos 24 dólares barril.

D'entamu'l xorrecimientu de la economía de los Estaos Xuníos va frenar énte los altos precios del petroleu. Los brokers ya asumen que los mercaos financieros van tener qu'acostumase a un petroleu mui penriba los 30 dólares barril. L'oru prieto baxó esta selmana un 1,9% hasta los 36 dólares barril.

Selmana negativa nel mercáu de renta fixo. Al final de la selmana pasada'l bonu de referencia, l'alemán, algamó una rentabilidá del 4,38%. Nel mercáu de les divises l'euru entamó un nuevu ciclu de xubes colo que ya lleva trés selmanes ganándo-y terrén a un dólar que paecía que diba dar muncho más de sí. Asina l'euru ya cotiza nos 1,2260 dólares-unidá. Pero lo más importante de la selmana foi la confirmación por parte del mercáu de futuros del entamu d'un nuevu tiempu nos tipos d'interés. Los inversores tienen asumío que los tipos van xubir, posiblemente cerca de 0,5 puntos básicos na próxima reunión de la Reserva Federal nesti mesmu mes de xunu. Les perres van ser mas cares, y ye facil que finen esti añu con un interés del 2,25%, cuando agora tan nel 1%.