Entama la Vuelta a Asturies

La Vuelta Ciclista a Asturies entama esta tarde cola primer etapa ente Uviéu y Llanes. Esta edición, en que la Vuelta puntúa con más categoría dientro de les competiciones ciclistes internacionales de la UCI, tien una inscripción de primer nivel, rescamplando la presencia del campeón del mundu Santiago Botero col equipu alemán Deutsche Telekom. Jan Ullrich, la otra gran figura del cartel de la competición, nun va poder tar n'Asturies por culpa de la suspensión que-y impunxo al equipu Coast la Unión Ciclista Internacional, pero con too y con ello, la llista de corredores ye de les meyores de les que tuvo nunca la clásica asturiana, incluyendo a Leonardo Piépoli, ganador nel 2.002 y Joseba Beloki, segundu nel Tour de Francia,

En cuantes al recorríu, la falta d'una cronometrada y el protagonismu de la montaña nos cinco díes de competición fai de la ronda astur una carrera pensada a costafecha pa los escaladores. Ente les etapes más dures rescampla la que remata nel Altu l'Acebu con pasu pel Pozu les muyeres muertes y el Counio y tamién la última, etapa especial qu'enxerta na carrera per etapes la clásica Xubida al Naranco d'Uviéu

No que cinca a la participación asturiana, esta ye la vuelta con más corredores del país en bien de tiempu, ocho ciclistes asturianos qu'amás espeyen el remocique del ciclismu profesional n'Asturies. Valga nesti sentíu con dicir que Samuel Sánchez ye'l más veteranu del pelotón astur, nel que namás falten Chechu Rubiera (el US Postal nun s'apuntó a la ronda astur) y Samuel Sánchez, que ye baxa por tendinitis nel Phonak. Amás de Samuel Sánchez (Euskaltel), faen el conxuntu asturianu Marcelino García (Labarca), Benjamín Noval y Luis Pasamontes (Relax), Ricardo Valdés (Paternina) y Iván Alvarez, Carlos Barredo y Mario de Sárraga, tres mozos que van correr cola Selección Española de ciclistes sub-23. Información al minutu nel web de la carrera