Entama la campaña'l salmón

Güei sábadu entama la campaña d'anguaño del salmón n'Asturies. L'actu oficial d'apertura de la mesma va ser a la 1 y media del mediudía nel Monesteriu de Curniana, onde se celebra estos díes la Feria del salmón.

La Dirección de de Mediu Ambiente remembra énte l'entamu d'esta campaña que les estadístiques de pesca de salmón de va trés años p'acá espeyen una clara baxada, anque ello nun quier dicir que tea menguando la población d'esta especie. Mediu Ambiente remembra qu'hai una clara recuperanza de los exemplares reproductores que lleguen vivos a la freza, sobremanera nos ríos Seya, Narcea, Cares, Eo y Esva, amás de rexistrase una bona xuba esti iviernu de críes de salmón pela presa del Furacón nel Nalón. Con ello, la Conseyería cuenta con qu'esti añu se dea una entrada curiosa a los ríos asturianos de salmones del añu y de salmón de mar de dos años.

Con too y con ello, la Dirección diz qu'hai un peligru grave pa los báramos de salmón que baxen pel Atlánticu y se meten pela parte d'Irlanda, onde caen nes redes de los pescadores irlandesos, a los qu'entovía nun se-yos pudo mercar la cuota que tienen acutada d'esta especie.

La Conseyería, que da anuncia de que ta faciendo un llabor importante d'igua de llugares de freza, soltó esti añu hasta 530.000 críes de salmón, y perita la población de críes nos ríos asturianos nun total de 800.000. Y ye que lo que van tener enfrente nun ye poco.De les 42.000 llicencies de pesca que se dieron pa esta campaña n'Asturies más de 13.000 van dir a salmón, y la Conseyería piensa que les captures van andar pelos 1.700 pexes. Como novedaes, pue volver a pescase nel Porcía, y nel cotu de San Román nel Nalón van poder usase toles artes.