Entama la campaña electoral

La campaña electoral pa la consulta del 25 de mayu entama formalmente esta nueche a les 12, y, anque los partíos yá lleven delles selmanes faciendo propaganda, ye dende esta nueche que puen pidir directamente'l votu. Los candidatos a la Xunta Xeneral del Principáu polos estremaos partíos que se presenten yá anunciaron onde van dir esta nueche a pegar los primeros cartelos electorales

Pela parte de la FSA-PSOE, el presidente Álvarez Areces va tar pegando cartelos xunta'l candidatu por Uviéu Leopoldo Tolivar pa la parte del Campillín, n'Uviéu.

El candidatu del PP Ovidio Sánchez tamién va poner cartelos n'Uviéu, anque nun se sabe en que sitiu. Pela so parte, el candidatu d'IU-Bloque por Asturies, García Valledor, escoyó Xixón, y va poner el primer cartelu al llau de la estación de los Alses de Xixón, pa depués dir a Uviéu a pegar el simbólicu primer cartelu xunta'l candidatu l'alcaldía carbayona, Sánchez Ramos. El cuartu partíu en resultaos nes anteriores elecciones, la URAS, va pegar tamién n'Uviéu, esactamente pa la parte del Campus de Santuyano, per onde va poder vese a Sergio Marqués xunta'l candidatu renovador a l'alcaldía de la capital. El candidatu del Partíu Asturianist, Xuan Xosé Sánchez Vicente, va pegar precisamente enfrente de la Xunta Xeneral del Principáu, edificiu nel que tuvo asientu hasta les elecciones del 99, cuando raspió l'escañu pero quedó fuera del parlamentu.