Ensin noticia de la especialidá d'asturianu
|
21 Marzu, 2024 por Redacción
- Inicie sesión o rexístrese pa espublizar comentarios
Nun hai declaraciones al respeuto d'Adrián Barbón llueu d'aconceyar cola ministra Alegría. El presidente anunciara la selmana pasada que "quiero tener la oportunidá de falar direutamente con ella d'esti tema".
Les declaraciones del socialista difundíes pol Gobiernu sobre la visita de Pilar Alegría centróse en Les Escuelines y n’otros asuntos d’actualidá, pero nun faen referencia nenguna a la especialidá docente d'asturianu. La responsable de la cartera d’Educación, Formación Profesional y Deportes desplazóse a Asturies pa conocer de primer mano’l proyeutu de Les Escuelines, una axenda qu’incluyía a les 9.30 hores un aconceyamientu col llavianés en Presidencia y una visita posterior a centros d’Infantil de Ponga, Cangues d’Onís y Parres en compañía del mesmu presidente y de la conseyera d’Educación, Lydia Espina.
El vienres Barbón, falando sobre esi alcuentru con Alegría, anunciaba a los medios que “otru tema que quiero plantegar a la ministra aprovechando esta visita, que sé qu’esmolez: la especialidá docente d’asturianu que, como saben, por nun tener reconocimientu d’oficialidá nun pue sacase alantre. Tamién quiero tener la oportunidá de falar direutamente con ella d’esti tema”.
Nel momentu de redautar esta información el presidente entovía nun fixera declaración nenguna sobre un asuntu qu’él mesmu citara va menos d’una selmana como ún de los elementos centrales a tratar cola ministra. El Gobiernu, por contra, sí difundiera na información sobre la visita d’Alegría audios del presidente sobre Les Escuelines, el clima de crispación que siente na Xunta Xeneral esta llexislatura, l’alderique sobre la financiación autonómica entamáu por Catalunya, la llibertá de prensa y el sorprendente cambiu del proyeutu de la vía de Xove por parte de Tresportes, pero nada sobre la especialidá docente.
Na semeya, Alegría y Barbón conversen en Presidencia.
Efrén d'Andrés
Lo + visto de la selmana
