Encierros pola escuela pública

El Movimientu Social pola Escuela Pública y profesores de la Xunta de personal docente non universitariu, entamaron ayeri un encierru nel Institutu Xovellanos de Xixón nel que se denunció que los responsables de la conseyería actuen ensin contar colos sindicatos y que practiquen política de fechos consumaos respective a l'alicación de la Llei de Calidá de la enseñanza n'Asturies . Los decretos que desarrollen la LOCE n'Asturies tienen de pasar entovía per Xunta de Gobiernu del Principáu, qu'aplazó'l xueves pasáu la decisión definitiva sobre estos documentos, ente los que'l más criticáu ye'l decretu d'almisión en centros, que, al dicir de la plataforma, empobina a tolos alumnos con problemes a la escuela pública, llibrando a la concertada de tener que trabayar con ellos.

Ente los temes que precisen de solución más urxente pa los sindicatos representaos na Xunta de personal docente apunten tamién a la tisoria qu'entró nos presupuestos, a la situación del profesoráu interíny sobremanera a l'aplicación acelerada, y a mes y mediu de les elecciones, de la Llei Orgánica de Calidá de la Enseñanza. Manuel Manin, presidente de la Xunta de Personal Docente Non Universitario, dixo que nun se descarta dir a la fuelga. L'encierru del Xovellanos va repetise güei nel IES Santa Bárbara de La Felguera en Llangréu y mañana nel IES Doctor Fleming d'Uviéu.