Enánchase'l parque eólicu asturianu

La Conseyería d'Industria aprebó ayeri la construcción d'un parque eólicu nel Chao das Grallas, en Vilanova d'Ozcos, un proyectu que recibiere de la que se presentó nel 99, delles alegaciones de colectivos ecoloxistes, que s'encontaron en fallos nel estudiu d'impactu y na presencia de resclavos prehistóricos pa refugar el proyectu, que consta de 15 xeneradores de 2 megavatios con centru de tresformación de 2.100 kv y dos llínies de 30 kv que van enterraes hasta la subestación de tresformación.

En mayu del 2000 el Principáu desestimó les alegaciones a esti parque asitiáu a 1.090 metros d'altra, pero nel 2001 el Principáu anunció tamién una moratoria de dos años en nueves concesiones de parques eólicos que ta acabante de vencer. Daquella, Industria pidió-y un informe al Ayuntamiento de Vilanova d'Ozcos, qu'a la fin afaló la construcción del parque.

La empresa Terranova Energy tien otru parque más funcionando nel conceyu de Vilanova, el de La Bobia, onde invirtió 42 millones d'euros en construyir una instalación con 58 xeneradores qu'igüen una potencia total de 49,3 mw. Esti parque, el más grande que funciona anguaño n'Asturies, aporta-y al conceyu una renta de 3.000 euros por cada xenerador y tamién supón una fonte d'ingresos pa los vecinos, que reciben renta pol terrén qu'ocupa'l parque.

Xunta l'anuncia de l'aprebación d'esti parque nos Ozcos, la empresa asturiana Electra Norte, filial d'Electra del Carbayín, entamó'l 20 d'ochobre la construcción d'otru parque eólicu nel occidente, esta vegada en Penouta (conceyu de Bual), una instalación más recoyía que les de la empresa con namás 7 xeneradores de 850 kW caún y una potencia instalada de 5,950 MW, abondo pa furnir de corriente a 6.000 viviendes, según la empresa.