Emprendedores na Feria de Muestres

Esti añu, como ya vien faciéndose dende´l añu 2.000, los proyectos empresariales de los emprendedores xixoneses van poder vese na Feria Internacional de Muestres d´Asturies (FIDMA). L´Ayuntamientu de la Villa de Xovellanos va entamar otra vegada más el so plan "Promover Xixón" aprovechando l'eventu más visitáu del país, la perconocía Feria de Muestres. L´oxetivu ye dar a conocer a les nueves empreses del Conceyu de Xixón gracies a esti proyetu que diríxe l´Axencia de Promoción Económica y Emplegu del Ayuntamientu de Xixón.

Del total de 33 iniciatives empresariales que se presenten, venticinco ya tan furrulando mentantu les otres ocho van entamar d'equí a poco cola actividá comercial. Les figures xurídiques de les nueves empreses son tamién mui estremaes; autónomos, sociedaes llimitaes, cooperatives o comunidaes de bienes, mientres que les actividaes son de lo más estremao, dende arreglu de muebles, diseñu de moda hasta reciclaxe y enerxíes renovables xunta informática, retulación, cuidáu de neños o hasta terapies de salú con caballos.

De toles formes, el númberu de proyectos ye pequeñu, lo que demuestra'l pocu espíritu emprendedor del país. Llama l´atención que teniendo un bon capital humanu, casu de les escueles técniques de la universidá asturiana en Xixón nun s´entamen proyeutos tecnolóxicos innovadores. Tamién la desmotivación de la mocedá astur tien d'influyir na feble creación de nueves empreses nun país que sigue ensin tener un parque curiosu d'empreses que se dediquen a la esportación, como sí que pasa na nuestra rodiada.