Emocionante primer etapa

La primer etapa de la Vuelta a Asturies con meta en Llanes vio'l trunfu del corredor murcianu del Liberty Seguros Luis Leon Sánchez, que ganó al sprint a David Navas. Sánchez, que ye tamién el primer líder de la xeneral, confírmase con esti trunfu como una gran promesa del ciclismu al amestar, con namás venti años y nel primer añu de profesional, dos trunfos d'etapa, el d'ayeri y el de la crono na clásica d'Alcobendas (Madrid)

El pelotón llegó francíu en dos cachos a la meta dempués d'una carrera bien emocionante na que, anque se corrió lloviendo y orpinando, la media de velocidá foi de más de 45 km/h. Una primer escapada de venti corredores nel Altu La Llama, de segunda categoría, obligó al pelotón a esconsoñar y entamar una caza a tou meter pela carretera moyada, pero en pasando Ribeseya saltó un segundu grupu de fugaos nel que se metieron el que dempués diba ganar la etapa y xente de la importancia pa la xeneral d'Isidro Nozal Haimar Zubeldia, Félix Cárdenas.

Esti grupu foi a abrir un furacu de cerca de minutu y mediu, entrando a meta con más d'un minutu de ventaya sobre'l pelotón principal nel que taben Leonardo Piépoli, Roberto Heras o Fabian Jeker.

Asina, la xeneral queda mui abierta pa la etapa de güei ente Llanes y Xixón, na que los corredores tienen de pasar pel clavu de Samartín de Güerces, ún d'esos altos con ramples que dexen a los corredores varaos enriba'l manillar.

El pronósticu pa güei, polo tanto, ye d'etapa rápida, movida y con munchos intentos de fuga, sobremanera de parte de los corredores que perdieron tiempu na etapa d'ayeri. Más nun se pue pidir.

La nota desgraciada de la etapa foi l'accidente del corredor madrileñu Alberto Contador, que quedó inconsciente y precisó d'una intervención urxente y quedó ingresáu nel Hospital d'Asturies.