Emburrión pa los proyectos d'estracción de gas n'Asturies

La multinacional Heritage Petroleum PLC, qu'anda con un importante proyectu pa sacar gas metanu de les mines de carbón abandonaes d'Asturies, ta acabante d'anunciar novedaes sobre los sos planes. En concreto, la empresa americana esplicó la estructura empresarial y l'importe financieru de les operaciones que quier llevar n'Asturies, onde va a operar al travíes de la sociedá Hidrocarburos del
Cantabrico SL, que ye una " joint venture" na que Heritage participa al 25%, mientres que'l 75% restante cuerre al cargu de la empresa irlandesa Energy Finance Limited. L'alcuerdu inclúi una claúsula pola que Energy Finance pue retirase cuando-y pete en casu de que nun-y vea traza de rentabilidá al proyectu.

L'anuncia de la creación de la Joint Venture vieno acompañada de datos sobre les dos concesiones que tien Heritage Petroleum N'Asturies, la de Mieres, qu'albarca 307 kmts2 en dellos conceyos de la cuenca del Caudal y la de La Camocha (Xixón), que tien 207 kmts2 d'estensión. Ello ye que en La Camocha Hidrocarburos del Cantábrico quier facer una campaña de sondéu de 18 meses con un un presupuestu de 200,000 euros. Esa campaña de sondeos yá ta fecha pa la concesión de Mieres, onde los primeros datos son d'un total de 43.4 billones de metros cúbicos de gas. Hidrocarburos del Cantábrico yá anda en tratos cola alemana EnD-I Grubengas GmbH pa desarrollar los recursos técnicos necesarios pa estrayer el gas de Mieres, que podría poner en mercáu yá pal añu 2.004

Lo del gas nes cuenques mineres nun ye nevo. En 1.989 la empresa Union Texas yá peritare los recursos gasísticos arreyaos a les vieyes esplotaciones mineres, tasando la reserva de gas de la cuenca central asturiana nunos 85 billones de metros cúbicos de metanu que podríen valer en mercáu hasta 2 billones de dólares en casu de poder recuperase too. D'aquella Union Texas dexó pa prau el proyectu, pero Heritage demostró, cola anuncia de que va sondiar la concesión de La Camocha, que tien idega de sacar alantre'l proyectu asturianu, ún de los munchos que la empresa americana ta moviendo anguaño n'Europa. Sólo nel Estáu Español Heritage tien 4 concesiones, mientres que en Francia tien otres tres más y ta acabante d'entrar n'otra campaña de sondeos na Sardinia (Italia).