“Elías tuvo años nos que de los 365 díes salió 340 al campu” pa observar páxaros, rellata Álvarez

|
Presentación Xornaes Elías García sentaos

Nel marcu de les Xornaes Elías García van desendolcase les VII Xornaes Ornitolóxiques Cantábriques, nes que se va tratar el llabor desendolcáu en vida pol ornitólogu. “El discu duru que dexó colo que tenía apuntao daría pa facer hasta tesis doctorales, trabayos d’investigación, sólo recopilando y analizándolo”, rescampla David Álvarez, que recordó tamién el so enfotu en plantar árboles autóctonos.

Como amuesa de la constancia de García nesta afición, un datu: “Elías tuvo años nos que de los 365 díes salió 340 díes al campu”, aseguró Álvarez, compañeru en munches d’eses xornaes. “Una de les coses más característiques que tien Elías ye la humildá y l’entusiasmu que tenía en too, tanto na música como nos páxaros. Y por eso nesti congresu ornitolóxicu que vamos organizar una parte mui importante ta mui rellacionada precisamente cola música, la música de los páxaros, porque los páxaros canten y faen música igual que los músicos, y de fecho la conferencia estrella ye del máximu especialista nel mundu en cantos de páxaros, el vienres, que ye un rapaz que vive nel estranxeru” de nome Magnus Robb.

“Va ser como’l colofón pa xuntar eses dos pasiones que tenía Elías”, siguió Álvarez, que recordó que “l’afición d’Elías a los páxaros comenzó de casualidá y, por designios del destinu, esos páxaros que canten y esa música que fai él tuvieron xuníes dende’l final. Podemos dicir qu’Elías siempre tuvo na cabeza páxaros. Intentaremos dar unes pincelaes de los muncho qu’aportó Elías”.

Un trabayu del que dexó munches notes. “Yera meticulosu al estremu, teníalo too apuntao. Voi intentar que parte d’esi trabayu salga a la lluz porque daría pa facer hasta tesis doctorales, trabayos d’investigación, sólo recopilando y analizando lo que nos dexó nel so discu duru”.

Álvarez y el restu de persones que participen nesta iniciativa tuvieron nidio dende un primer momentu que les Xornaes Elías García yeren una gran oportunidá pa “recuperar unes xornaes qu’empezaron con muncho ritmu, pero foron apagándose… Unes xornaes sobre esa naturaleza que-y gusta a Elías, la parte húmeda d’España, que tien una avifauna que ye mui especial y mui distinta a la del sur”. Asina, “consigiumos reunir ponentes top, alumnos de la universidá que van esponer los sos trabayos… Va ser una actividá mui guapa y importante y oxalá que sía’l puntu d’arranque pa que se repitan”.

D’igual forma, va entamase un taller de dibuxu y iniciación al cuadernu de campu ornitolóxicu que va tener llugar el sábadu 17 a les 12 hores empobináu pa neñes y neños mayores de 10 años, anque ensin llende d’edá. Va ponelu un “amigu personal d’Elías que ye una estrella, otru que se paez muncho a él”, Gonzalo Gil, al que califica como “ún de los meyores pintores qu’hai de naturaleza, con muncho”.

La plantación, n’Espina

Otra de les actividaes confirmaes va consistir nuna plantación nuna parcela cedida pol Conceyu de Villaviciosa n’Espina, na contorna de La Ría na parroquia de Seloriu. “Igual qu’a Elías nun-y gustaríen les plaques, tener un cachín de monte pa quitar los ocalitos y plantar unos arbolinos autóctonos ye lo que más-y gustaría”, apunta Álvarez.

Va tener llugar la mañana del domingu 18 con enfotu de continuidá y al igual que les otros eventos son de baldre previa inscripción nel corréu de les Xornaes Elías García que se pue consultar na web. “Nun va ser cosa d’un día, la gracia ta en qu’esa finca se mantenga y vayamos faciéndolo poco a poco, porque un monte nun se crea nun día”, comentó l’ornitólogu, que recuerda que la furgoneta de García siempre contaba con “un palote, unes botes d’agua y unes tisories de podar”.

“Toi d’alcuerdu con Ambás de que si Elías tuviera mirándonos per un furaquín taría muertu vergoña y corriéndonos a gorrazos”, apuntó tamién Álvarez, que confesó que nel congresu “saldrán 200.000 anécdotes d’Elías, una persona que cuando lu recuerdas siempre te sal una sonrisa”.

Na semeya, José Miguel Beneyto, miembru de la Xunta Direutiva del Atenéu Obreru de Villaviciosa; l'alcalde Alejandro Vega; Xosé Antón Fernández 'Ambás', que presentó la estaya musical de les Xornaes Elías García; Álvarez; y Beatriz García Doral, prima del músicu y ornitólogu y representante de la familia, que faló de la esposición que s'inaugura'l día 9.

Contador Estadistiques