Elecciones pal 14 de marzu

El Gobiernu del estáu ta acabante de dar anuncia de la fecha de les novenes elecciones xenerales dende la fin de la dictadura, que tienen de celebrase en marzu. Según esplicó'l ministru Eduardo Zaplana'l prósimu día 19 va facese una reunión especial na que van disolvese les dos cámares, mientres que la campaña va entamar oficialmente'l 27 de febreru y el día de la votación va ser el 14 de marzu. El decretu de disolución de les Cortes y de convocatoria d'elecciones tien de salir nel Boletín Oficial del Estado del día 20 de xineru y d' esa fecha en p'alantre entamen a contar tolos plazos pa les elecciones, ente ellos el día en que se faigan públiques les candidatures aprebaes, que va ser el 11 de febreru. Andalucía va ser la única comunidá autónoma onde les elecciones autonómiques coincidan coles estatales.

Nestes elecciones Asturies va escoyer un diputáu menos que nes del 2000, pasando de 9 a 8 por efectu de la baxada de población n'Asturies. La proporción repartu d'escaños, que nel 2000 foron 5 pal PP, 3 pa PSOE y ún pa Izquierda Xunida, tamién pue camudar enforma por cuenta d'ello.