El XXVI Festival Intercéltico d'Occidente recupera la Noite Máxica

Dende'l 2019 nun se celebra esta actividá tan siguida del certame que se celebra en Tapia.

A les 19 hores d'esta tarde va inaugurase'l XXVI Festival Intercéltico d'Occidente (FID'O) col izáu de la bandera celta frente a la Casa Conceyu. Un actu, que va contar cola presencia del alcalde Pedro Fernández García y Martín F. Cascudo, direutor del certame qu'entama la Banda Gaitas Occidente, qu'abre cuatro xornaes de música y actividaes na villa.

La recuperación de la Noite Máxica cuatro años depués ye la principal novedá del FID'O. Los años de pandemia y la celebración de ventenu quintu aniversariu cola presencia de Carlos Núñez llevaron a non entamala nesti tiempu, pero'l sábadu la playa del Murallón va enllenase de públicu pa presenciar otra vuelta esti espectáculu tan esperáu.

Va ser a les 23 hores y nella van participar nesta ocasión el Grupo de Teatro Pico de Faro, Os Mismos de Sempre y la Comisión de Fiestas de Puerto de Vega.

Artistes d'Occitània, Alba, Irlanda del Norte, Galicia y Breizh

La xornada inaugural va contar con una actuación nel Auditorio de Tapia de dúu Rubén Bada & Pepín de Muñalén, a les 20.30 hores, con accesu por donación de 5 euros hasta completar aforo. De nueche, a les 23 hores, va entamase una verbena tradicional nel puertu con Xarangana.

El conciertu de mañana, el primeru nel Murallón (22.30 hores), va contar cola presencia de la Banda Gaites Villa Mieres, de Rubén Bada y Nel de Purnea y del occitanu Guilhem Desq, mentes que'l domingu van actuar a la mesma hora La Bonturné y los escoceses RURA. Esta xornada tamién van actuar la North Coast Dance Company, formación d'Irlanda del Norte que repite nel FID'O, a les 20.30 hores nel Auditorio (5 euros).

Los tapiegos y los visitantes que s'averen al llugar estos díes tamién van poder disfrutar de la presencia de l'Agrupación Folclórica Froles Novas y la Banda Gaitas Airiños de Fene (Galicia) y la Bagad Men Glaz (Breizh). Dende Llanera, mentes, van desplazase la banda gaites y el grupu de baille de l'Asociación Cultural La Madreña.

El FID'O complétase con un ampliu programa nel que nun falten un mercáu celta, esposiciones ('El folclore de Tapia bajo el objetivo' nel Auditorio), cursos y talleres de música tradicional y baille, conferencies y teatru infantil. Tamién actividaes yá clásiques como l'Homenaxe a los Marineros (sábadu al meudía nel mirador d'Os Cañóis) o l'Alborada del Mar (domingu a les 12.15 hores na punta del Muelle).

El llunes, col arriáu de la bandera celta, ponse fin a esta edición d'un festival especial pola manera na que se vive en Tapia.

Na semeya, escenariu instaláu na playa del Murallón na edición pasada del FID'O.