El veteranu Fanigni ganó en Xixón

El veteranu ciclista Gian Matteo Fagnini (32 años), antiguu lanzador d'esprints pa Mario Cipollini o Erik Zabel ganó ayeri la la segunda etapa de la Vuelta Ciclista a Asturies con meta nel Muro de San Llorienzo de Xixón, onde ganó por poco a Carlos Torrent (Paternina-Costa Almería). Anque la llegada foi al esprint, los 163 kilómetros ente Llanes y Xixón feron bien emocionantes, rexistrándose una media de 43,105 km/h , rapidísima pa ser un terrén duro y ruempepiernes. La carrera franció camín de Colunga, cuando marcharon ventidós ciclistes que llegaron a sacá-y al pelotón un minutu de ventaya. Pa cuando los corredores del ibanesto.com se decidieron a cazar a los fugaos, Nozal, del Relaz Fuenlabrada, yá marchare solu p'alantre, llegando asina al Altu La Campa, onde se-y xuntaron el mierense Benjamín Noval (Relax-Fuenlabrada) y el portugués Pedro Lopes (La Pecol). Sicasí, en pasando Muncó, el grupu acabó cazándolos, pero enfrente taba l'altu de Samartín de Güerces, onde foi otru corredor del Relax, Santi Blanco, el que marchó solu. Faltaben 25 kmts, y la carrera taba rota dafechu. Chaurreau y el portugués Andrade xuntáronse a Santi Blanco yá a la entrada de Xixón, pero el
Milaneza tiró y acabó con ellos a 2.000 metros de la llegada. Nel esprint Ángel Edo tiró demasiao ceo y asina pasáronlu Fagnini, Torrent, Arrieta y Massimiliano Gentili. L'asturianu Samuel Sánchez entró el sestu.
Ver vídeu: los ciclistes al pasu per Samartín de Güerces