El V Festival Nel Amaro sigue con 'Les piripiripirates con parches y a lo xole'

Ye la tercer obra finalista del gallardón de teatru n'asturianu y gallego-asturiano. Autores nel Camín lleva a Emma Méndez a Santalla d'Ozcos.

Factoría Norte defende esta tarde, a les 20 hores nel Teatru Filarmónica, la obra 'Les piripiripirates con parches y a lo xole', destinada a un públicu infantil. Esta compañía de teatru busca'l so segundu Nel Amaro, yá que llevó la tercer edición, la del 2019, con 'Les rellaciones peligroses'.

La historia aspirante nesta ocasión trata sobre una capitana aventurera y la so valiente grumete, les piripiripirates Bogavanta y Anchoveta, qu'entamen un viaxe a la gueta d'una ayalga.La mar ye pa elles la ventana a un mundu nuevu, onde too ye posible, pero pel camín van tener qu'iguar enigmes y vencer al monstruu de los mares.

Carmen Gallo y Eladio de Pablo firmen el testu y la direición d'esta obra, protagonizada poles actrices Sheila Montes y Paula Mata, que cuenta tamién colos cantares de Mar Álvarez. La entrada pa presenciar la representación ye llibre hasta completar aforu.

El vienres viniente, a la mesma hora, completaráse esta fase del V Premiu y Festival Nel Amaro de Teatru Profesional en Llingua Asturiana o Gallego-asturiano con 'Setiembre', de José Rico Arte Producciones.

'Os secretos del molín veyo'

El Museo Casa Natal del Marqués de Sargadelos, en Ferreirela de Baxo, va ser sede tamién esta tarde, a les 18 hores, de la presentación del llibru 'Os secretos del molín veyo'. Esta actividá ta encuadrada nel ciclu Autores nel Camín.